Khul kon pơlei choh jang sa dêh char Đak Lăk dang ei đei hloh 194.000 ‘nu bơngai. Lơ̆m 5 sơnăm au ki, hlôi đei hloh 137.000 ‘nu bơngai lơ̆m khul chih hơnăn vang iung jang tơdrong jang "Kon pơlei pơting dih băl choh jang sa, mơdro sa hơgei, tơgoăt tơgoăl mĭnh nơ̆r ƀơ̆r đon tơgŭm djru dih băl pơm pơdrŏng păng tơjur dơnuh kơjăp ‘lơ̆ng". Vă jê̆ 103.000 ŭnh hnam iŏk đei jing kon pơlei choh jang sa mơdro sa hơgei, rim ŭnh hnam au hlôi tơgŭm djru pơjing đei tơdrong jang ăn hloh 25.000 ‘nu bơngai jang.

Tơdrong jang,  Kon pơlei pơting dih băl choh jang sa, mơdro sa hơgei, tơgoăt tơgoăl mĭnh nơ̆r ƀơ̆r đon tơgŭm djru dih băl pơm pơdrŏng păng tơjur dơnuh kơjăp ‘lơ̆ng tơ̆ Đak Lăk jei tơgop kơtang vă 11.000 ŭnh hnam kon pơlei choh jang sa hơdrin yak hloh dơnuh, sơđơ̆ng hơrih sa. Yă Lại Thị Loan, Kơdră chĕp pơgơ̆r Khul choh jang sa dêh char Đak Lăk tơbăt, lơ̆m jăl ‘nao, Khul kon pơlei choh jang sa rim hơnih gô hơnơng atŏk kơtang pơgơ̆r rim tơdrong jang mơdro sa, pơtho tơbăt tơgŭm djru kon pơlei choh jang sa atŏk tơ iung choh jang sa, pơm tơlĕch tĕch mơdro tơmam drăm.