Pơtruh nơ̆r hăm Khul tang măt ăn Kuôk hô̆i dêh char Kon Tum, kon pơlei tah hla pơlei tơm Kon Tum pơtruh nơ̆r, hơpơi 'meh sek tơlang mă tơnăp tơdrong tơhlăk tơhlĭn gah teh, păng dôm tơdrong jang hlôi pơdui đunh kơ ou 25 sơnăm kon pơlei asong jên răt 46 rơvak teh tơ̆ xah Vinh Quang kơyuơ Anih jang vei lăng kon pơlei xah asong ăn.

Tơl nơ̆r apinh đơ̆ng kon pơlei, ƀok Dương Anh Hùng, Phŏ Kơdră Anih jang vei lăng kon pơlei pơlei tơm Kon Tum ăn tơbăt, tơdrong mă Anih jang vei lăng kon pơlei xah Vinh Quang asong ăn 46 rơvak teh tơ̆  km7- Jăl trong 14 ăn dôm unh hnam kon pơlei păng iŏk jên, Anih jang Hơlen dêh char Kon Tum hlôi sơkơ̆t hơdah noh glăi hăm tơdrong pơgơ̆r. Ƀok Phạm Đình Thanh, Phŏ Kơdră Khul tang măt ăn Kuôk hô̆i dêh char Kon Tum hlôi chih akŏm nơ̆r pơtruh ou păng đei hla bar pơtruh ăn Anih jang vei lăng kon pơlei dêh char Kon Tum athei hơlen păng dah sek tơlang tơtenh.