Dôm năr ‘nâu, tơ̆ tơring Kơdrâm Ân Phú, phường Tân Lợi, plt Buôn Ma Thuột, dôm jĭt ‘nu bơngai năm truh pơm hla ar tĕch, răt tĕh, pơm ăn yă tĕh tŏk kiơ̆ rim năr. 2 khei adrol ki, 1 lô teh xă 100 m² tơ̆ âu đe tĕch dang 2 ti hlak jên, ‘nŏh dang ei tŏk truh 2,5 ti. Ưh lăp teh tơ̆ tơring kơdrâm tŏk đĕch, mă teh tơ̆ lơ xăh phương păng tơring jŭm dăr plt Buôn Ma Thuột kŭm tŏk dang 20%.

Yă Phạm Thị Thanh, tơ̆ phường Đạt Hiếu, thĭ xăh Buôn Hồ, dêh char Đắk Lắk, ăn tơbăt: kon drŏ nglo păng mŏ mai yă oei bơ̆ jang tơ̆ anih jang ăn teh đak tơ̆ dêh char Phú Yên. Tơdăh 2 dêh char tơmât hơdai, rŏ năng đe kon sư vă brŏk oei tơ̆ Buôn Ma Thuột bơ̆jang păng arih xa. Yoa thoi noh, unh hnam yă Thanh oei tơchă teh vă răt, man hơmet hnam hơdrol: “Kơtơ̆ng đe roi ang vă tơmât hơdai 2 dêh char đunh kơ âu 2 khei bơih, inh năm tơ̆ tơring Kơdrâm Ân Phú apinh lô 100 m² ‘nŏh đe tĕch 2 ti, inh oei hul hơl tam mă răt. Mă lei dang ei kơtơ̆ng đei roi tơpă akhan Đắk Lắk tơmât hơdai hăm Phú Yên, inh apinh dơ̆ng ‘nŏh đe tĕch 2,6 ti. Yă tŏk hrĕnh dêh, mă lei jơhngâm đon kăn ƀô̆ đơ̆ng Phú Yên đe ‘mĕh đei hnam oei sơđơ̆ng ‘lơ̆ng kơna athei adrin răt ăn đe kon sâu man hnam. Ưh jor inh vă adrin răt ‘năi, tơdăh ưh ‘nei hơmet teh tŏk hlŏh dơ̆ng.”

Ƀok Phan Thái Bình, Kơdră vei lăng 1 công ty tĕch mơdro teh, hnam oei tơ̆ Buôn Ma Thuột ăn tơbăt, hăm 100 ‘nu bơngai jang, jô̆ păh lăp 1 năr công ty tĕch đei dang 20 lô teh, hnam oei. Pơting hăm yă teh jur dêh hlŏh ƀât hơtuch sơnăm 2022, ‘nŏh ‘nâu jĭ yă tĕh tôch ‘lơ̆ng: “Năng atŭm, tơdrong tĕch mơdro teh, hnam oei tơ̆ Đắk Lắk oei tŏk ‘lơ̆ng ƀiơ̆ pơting hăm adrol ki. Tơdrong ‘mĕh vă răt teh tŏk, 1 păh ‘nŏh yoa hŭt lê̆ apŭng, kăn ƀô̆ jur jang đĭ tơ̆ xăh, 1 kơsô̆ nai đe tŏk jang tơ̆ Buôn Ma Thuột. Găh noh dơ̆ng, lơ bơngai kră pơdơ̆h hưu kŭm ‘mĕh vih tơ̆ Buôn Ma Thuột arih xa. ‘Ngoăih kơ 'nŏh, đơ̆ng rŏng kơ tơdrong tơroi tơmât hơdai dêh char, adrol kơ ‘nŏh kŭm đei lơ bơngai đơ̆ng Đắk Nông tŏk răt bơih, hrei 'nâu đei dơ̆ng bơngai đơ̆ng Phú Yên chă răt hai. Đe sư jĭ bơngai 'mĕh chă teh vă pơm hnam oei tơpă.”

Kơsô̆ chih jô̆ đơ̆ng Anih pơm hla ar teh – Anih vei lăng choh jang xa păng cham char Đắk Lắk ăn ƀôh, lơ̆m jăl khei mă I sơnăm 2025, dôm anih jang găh sư iŏk pơm vă jê̆ 75.000 blăh hla ar ƀơm truh tơ̆ teh, tŏk hlŏh 17% pơting hăm khei âu sơnăm sơ̆.

Ƀok Hoàng Xuân Phương, Phŏ Kơdră vei lăng Anih pơm hla ar teh akhan, hla ar đe pơm tŏk lơ pơm ăn lơ anih jang tơ̆ plt Buôn Ma Thuột păng apŭng Cư M’gar bơ̆ jang ưh kơ tom: “Anih pơm hla ar teh pơtho ăn dôm anih jang găh sư hơtŏk dơ̆ng anih jang iŏk pơm hla ar teh păng hơnơ̆ng tơgŭm ăn kon pơlei, vă đe sư huei kơ gô đunh. ‘Ngoăih kơ ‘nŏh, đơ̆ng ‘năr 1/4, nhôn tơlĕch trong pơm trư̆k tuyê̆n hơdai hăm anih thuê̆ păng lăm kĭ công chứng, vă bơ̆ jang kiơ̆ trong online. Blŭng a, trong jang âu hơnhăk ăn iŏk yoa ‘lơ̆ng, pơm đei lơ hla ar.”

Tơdrong tĕch mơdro teh, hnam oei tŏk pran tơ̆ Buôn Ma Thuột dôm năr âu ki đei đơ̆ng tơdrong tơroi tơmât hơdai dêh char, mưh tơring âu đei rơih pơm Anih jang tơm kơ dêh char Đắk Lắk ‘nao. Kŭm hăm lơ kăn ƀô̆, bơngai jang kơ teh đak truh tơ̆ tơring kơdrâm, Buôn Ma Thuột, hăm anih dơ̆ng ‘nao gô sơng đei roi lơ unh hnam, khul grŭp păng anih tĕch mơdro truh ‘năi./.