Iŏk đơ̆ng blŭng sơnăm 2006 tơ̆ Công ty 74 hăm 30 đôi ŭnh hnam, truh dang ei trong jang hlôi lang să jơ̆p lơ̆m Binh đoàn 15 hăm vă jê̆ 4.300 đôi ŭnh hnam oei lơ̆m kơhrĕng pơlei ‘moi kiơ̆ tơring sơlam teh đak găh Tu Tây Nguyên. 20 sơnăm tơlĕch jang, trong jang ou hlôi tơgŭm ăn trong bơ̆ jang đơ̆ng Đảng lang să ‘lơ̆ng hơ iă lơ̆m kon pơlei ‘moi kiơ̆ rim tơdrong jang hơdăh nhen “phĭ pơngot yak hơdoi dih băl”, “Hiôk mơmat yak hơdoi dih băl”, pơjing đei jơhngơ̆m pran tơpuh hŭt kĕ trong đe pơm chere hơdrĕch hơdrung. Đơ̆ng noh hơmet pơ ‘lơ̆ng tơdrong jang đĭ đăng kon pơlei vang vei lăng sơđơ̆ng teh đak păng kon pơlei vang vei lăng sơđơ̆ng sơlam teh đak. Hăm trong jang ou, lơ ŭnh hnam jang sa iŏk đei đơ̆ng 200–300 triu hlak jên lơ̆m sơnăm, pơjing đei hơrih sa sơđơ̆ng, xut hŭt dôm tơdrong joăt pă trŏ lăp, pơm tơjur kơtang tơdrong hŏk tro hŭt hŏk, kon pơlei kơdou jăk oei tơ̆ teh đak đe. Lơ̆m jơ ‘năr pơgơ̆r, rim kơdră tang măt vang tơgop nơ̆r, tơƀôh hơdăh trong jang hơ iă găh tơdrong chĕp pơgơ̆r ‘lơ̆ng đơ̆ng khul kơdră đảng, iung jang hơdoi kơjăp hăm khul kơdră chĕp pơgơ̆r tơring, atŏk kơtang hơnăp jang ‘lơ̆ng kơ kră pơlei, thôn trơng, bơngai đei kon pơlei lui yom, tơchăr hơgei tơlĕch jang kiơ̆ trong jang “Tơgoăt ŭnh hnam” tơgop tơ iung pơjing tơring sơlam teh đak sơđơ̆ng păng atŏk tơ iung tôm tong.