Tơ̆ hop akŏm, rim kơdră jang lơ̆m Hơnih bơ̆ jang ou drơ̆ng nơ̆r kơtang rim tơdrong mă Khul kơdră chĕp pơgơ̆r Hơnih bơ̆ jang hơmet ming Khôi luơ̆t Tơm teh đak hơmet ăn păng akhan dôm tơdrong lơ̆m rim hla bơar tơchơ̆t hlôi sơđơ̆ng ƀlep hăm tơdrong ‘meh vă tơchơ̆t. Pơma hơdăh tơdrong kăl kơ chăl sơnăm kơ tơdrong hơmet ming Khôi luơ̆t tơm Teh đak, Kơdră chĕp pơgơ̆r Kuô̆k hô̆i athei kăl tĕnh koăng tơlĕch jang kiơ̆ Trong pơprŏ jang pơgơ̆r iŏk nơ̆r tơgop đơ̆ng kon pơlei, rim hơnih jang, tơring păng pơtho tơbăt trong pơgơ̆r iŏk nơ̆r tơgop, chih akŏm dôm nơ̆r tơgop đơ̆ng Kon pơlei, rim hơnih jang, rim tơring găh trong vă pơjing Tơdrong tơchơ̆t Hơmet ming, tơmơ̆t dơ̆ng mĭnh ƀar apăng kơ Khôi luơ̆t tơm Teh đak sơnăm 2013. Kơdră chĕp pơgơ̆r Kuô̆k hô̆i athei iŏk đơ̆ng năr 6/5 gô poơgơ̆r tơbăt hơdăh iŏk nơ̆r tơgop đơ̆ng Kon pơlei găh đĭ đăng hla bơar Tơchơ̆t Hơmet ming, tơmơ̆t dơ̆ng mĭnh ƀar apăng kơ Khôi luơ̆t tơm Teh đak sơnăm 2013 păng rim hla bơar ƀơm truh lơ̆m Cổng thông tin điện tử Khul kơdră chĕp pơgơ̆r Teh đak, Cổng thông tin điện tử Kuô̆k hô̆i, rim Hơnih jang chih kơtơ̆ng ang: Radiô pơbăh Tivi Việt Nam (VTV), Radiô Nơ̆r Pơma Việt Nam (VOV), Thông tấn xã Việt Nam păng Cổng thông tin điện tử kơ hơnih bơ̆ jang vei lăng kon pơlei rim dêh char, pơlei tơm găh Trung ương.