Kon jên jang đơ̆ng rim grup jang Samsung, Intel, Foxxcon, Amkor ... oei hơnơ̆ng tơmơ̆t jên jang lơ̆m Việt Nam. Hơdrô̆ sơnăm 2024, FDI tơgop 16,5% akŏp kon jên tơmơ̆t jang lơ̆m tơpôl, vă jê̆ 72% akŏp kon jên iok đei đơ̆ng tĕch mơdro tơ teh đak đe, hloh 20 ti USD tơmơ̆t lơ̆m kon jên bơ̆ jang teh đak. ‘Ngoăih kơ ‘noh, kiơ̆ chih jô̆ đei ƀôh, tơdrong jang FDI hlôi tơgop pơjing đei hloh 5 triu tơdrong jang, pơm hơtok jang hơgei kơ bơngai jang păng hơnhăk đei iŏk yua kơjăp ăn bơngai jang. Kơ ieng kơdră chĕp pơgơ̆r Hơnih tơm jang Jên hu Đỗ Thành Trung pơma hơdăh: “Găh păh Khul kơdră chĕp pơgơ̆r Teh đak, nhôn kơrŭn đĭ ai hơmet pơ ‘lơ̆ng lơ̆m lơ tơdrong jang, đơ̆ng trong jang găh thuê̆, pơm hla bơar hơnih vei lăng tĕch răt hăm teh đak đe truh tơdrong jang tơmơt jên jang. Trong tơlĕch jang ‘noh pơm hơtŏk bơ̆ jang ‘lơ̆ng, bơ̆ jang keh đang hrôih, pơm tơjur kon jên jang păng tơgop pơjing rơvơn ‘lơ̆ng hơ iă hloh ăn hơnih mơdro sa tơmơ̆t jên jang pơm tơlĕch, tĕch mơdro tơ̆ Việt Nam”

Kiơ̆ đơ̆ng rim bơngai joăt jang, lơm khei năr apŭng plĕnh teh tŏk bŏk đei lơ tơdrong, pơm tơplih tơdrong tĕch răt lơ̆m apŭng plĕnh teh. Kon jên jang FDI lơ̆m apŭng plĕnh teh jei roi năr roi tơplih ‘moi kiơ̆ trong pơm tơjur gơnang lơ̆m minh teh đak mă lei tơplih ăn hăm roi tŏk kơtang tơmơ̆t jên jang lơ̆m rim tơdrong jang kmăi kmŏk hơgei, kmăi kmŏk gơ̆h hơgei adoi nhen atŭm hăm rim tơdrong pơkăp pơm tơjur đei tơdrong ‘mê̆ ‘mach cham char. ‘Ngoăih kơ ‘noh, tơdrong tơm pơm sơđơ̆ng trong tĕch răt păng sơđơ̆ng chinh trĭ roi năr roi đei lăng jing tơdrong kăl hloh lơ̆m rim tơdrong tơchơ̆t tơmơ̆t jên jang.

Hăm Việt Nam, tơdrong rơvơn lơ̆m pơjei ưh khan lăp đơ̆ng đei măt bơngai kon pơlei truh 100 triu ‘nu păng tơdrong răt  yoa kơtang, mă oei gơnơm lơ̆m tơdrong 17 tơdrong tơchơ̆t mơdro sa hiôk hian, lơ̆m ou đei lơ FTA chăl hle nhen CPTPP, EVFTA hăm RCEP… Jĭ mĭnh lơ̆m dôm tơdrong jang mŭk drăm kơtang hloh lơ̆m apŭng plĕnh teh, hăm akŏp tĕch răt iŏk đei lơ̆m GDP tŏk truh vă jê̆ 200%, atŭm hăm trong hnam kmăi kmŏk ling lang đei tŏk ‘lơ̆ng kơtang, tơdrong mơdro sa đei hơmet pơ ‘lơ̆ng, chinh trĭ sơđơ̆ng păng trong bơ̆ jang tơgŭm djru hơ iă,Việt Nam hơnơ̆ng jing hơnih truh hơ iă ăn kon jên tơmơ̆t jang FDI. 

Ƀok Chaturon Thipphiansak (Cha-tu-ron Thip-phiên- sặc)- Kơ iĕng Kơdră chĕp pơgơ̆r Công ty TNHH SCG Việt Nam, jĭ mĭnh hơnih mơdro sa pơm jŭk yŭk trong hơlou lơ̆m atŏk tơ iung rơgoh ‘lơ̆ng păng kơjăp ‘lơ̆ng, athei: “Rim hơnih mơdro sa kăl đei trong jang trŏ lăp hăm tơring păng pơm hơtŏk kĕ gei kơjăp vă kĕ yak hloh dôm tơdrong đei ƀơm đơ̆ng tơplih tơdrong jang mŭk drăm lơ̆m plei teh, kon jên tơmơ̆t jang păng tơmam drăm pơm tơlĕch rơgoh ‘lơ̆ng, dăh mă rim tơdrong pơkăp ESG kơhret kơtang. Tơ̆ SCG, nhôn lăng tơdrong tơplih ou jing tơdrong rơvơn vă yŭk trong hơlou ‘moi kiơ̆ rim tơmam drăm kơjăp ‘lơ̆ng, bơ̆ jang mơdro sa tơpăt ‘lơ̆ng păng tơgoăt kơjăp ‘lơ̆ng hăm păh tĕch răt dih băl, tơgop tŏk kơtang rơgoh ‘lơ̆ng kơ Việt Nam”.

Việt Nam tŏk bŏk yak mơ̆t lơ̆m chăl atŏk tơ iung ‘nao hăm hơmŏ tŏk kơtang vă iŏk đei ƀar kơnao trong tơlĕch jang atŏk tơ iung kăl lơ̆m sơnăm 2030 păng 2045. Tơdrong tơm ‘noh yak hloh tơdrong dơ̆ng đơ̆ng rŏng, veh ver kĕ jang sa iŏk đei jô̆ hơtŏ păh ai. Lơ̆m ou tŏk mŭk drăm kăl iŏk đei 8% lơ̆m sơnăm 2025 păng hơdrin iŏk đei 2 kơsô̆ lơ̆m jăl truh ou kơnh. Mă lei trong tơlĕch jang ou đei tơlĕch ăn lơ̆m khei ‘năr apŭng plĕngh teh tŏk bŏk druh kiơ̆ tơplih kơtang hloh, ưh kơ măh ê, mă kăl dôm tơdrong hơmet ming trong jang thuê̆ tĕch răt đơ̆ng teh đak Mi, teh đak đei ƀơm kơtang hloh lơ̆m tơdrong mơdro sa păng tơmơ̆t jên jang lơ̆m plei teh. Yă Trần Thị Hồng Minh, Kơdră chĕp pơgơ̆r Hơnih tơm Chă tơchĕng hơlen Trong bơ̆ jang păng Trong jang kăl tơbăt: “Tơdrong tơm kơ rim tơdrong jang ou vă lăng truh tơdrong lơ̆m khei năr kơnh, bơ̆n gô pơjing đei mĭnh trong jang kăl FDI lơ̆m chăl hle vă iung jang kiơ̆ đei jơnei păng tơdrong lang să jang kiơ̆ kơtang kơ rim hơnih mơdro sa FDI lơ̆m tơdrong jang mŭk drăm Việt Nam, mĭnh tơdrong mă lơ̆m lơ sơnăm ou ki bơ̆n ling lang gô chang hơpơi đei. Păng ‘nou jei dôm kơtơ̆ng ang tôch gĭt kăl vă rim hơnih bơ̆ jang kơ Đảng, Teh đak jang kiơ̆ trong bơ̆ jang đei ƀơm truh atŏk tơ iung mŭk drăm kơ Việt Nam lơ̆m khei năr kơnh păng mă kăl ‘noh trong tơlĕch jang mă bơ̆n hlôi pơlăp ăn vă kơ bơ̆n kĕ iŏk đei tŏk 2 kơsô̆ lơ̆m jăl jang 2026- 2030.”  

Hơmŏ, hăm dôm trong jang hơdăh đơ̆ng rim hơnih bơ̆ jang, tơdrong vang iung jang đơ̆ng tơpôl hơnih mơdro sa, Việt Nam gô pơjing đei tơdrong tơmơ̆t jên jang ‘lơ̆ng hơ iă, gơ̆h hơgei, iŏk đei jơnei kơjăp-ưh khan lăp ăn hơdrô̆ hơnih mơdro sa lơ̆m teh đak mă pơ đĭ lơ̆m khul mơdro sa FDI hlôi, tŏk bŏk păng gô rơih iŏk Việt Nam pơm hơnih truh.