Gơmăng hei 21/5, tơ̆ hnam chuơ Quán sứ, Hà Nội, Khul lui Phât Việt Nam sơng tơmam đơ̆ng ƀok Phât păng gre pơkao pơrŏ hơiă kơ năr Phật đản rơnĕh Phật lịch 2568- dương lịch 2024, soi apinh ăn teh đak rơngei, kon pơlei hiôk hian. Sơng tơmam đơ̆ng Ƀok Phật păng gre pơkao pơrŏ hơiă kơ Phật đản rơnĕh pơgơ̆r đơ̆ng 7 jơ kơmăng truh 9 jơ kơmăng, hăm tơdrong vang akŏm đơ̆ng rơbâu ‘nu bơngai lui phât, đe ƀok pơtho lui phật păng kon pơlei truh lăng.

Gre pơkao kŭm hăm mul Phật đản rơnĕh năm đơ̆ng Anih Trung ương Khul lui Phật Việt Nam 73 Quán Sứ, lĕch tơ̆ dôm kơ phô̆ Lý Thường Kiệt, Bà Triệu, Trần Hưng Đạo păng vih dơ̆ng tơ̆ 73 Quán Sứ, Hà Nội. Hăm rim bơngai lui phât Lêh Phật Đản jĭ tơdrong chơt hơiă, hiôk chơt đei tơƀôh dơ̆ng, mât hơdai hăm jơhngâm đon ‘lơ̆ng đơ̆ng lui phật, pơtho tơƀôh lơ nơ̆r ‘lơ̆ng, ‘mêm kơeng, gơ̆h hơgei, vei rong jơhngâm đon ‘lơ̆ng gô iŏk đei tơdrong ‘lơ̆ng.