‘Nâu jing tơdrong jang kăp gĭt lơ̆m hơyak Puih mak pơm jang – Têt ‘mêm kơ-eng kơ đe mơlôh Đăk Lăk tơrĕk truh bơngai hin dơnuh păng dôm bơngai tơnap tap lơ̆m ‘măng Têt nguyên đán Giáp Thìn. Lơ̆m tơdrong jang, jơnŭm pơgơ̆r hlôi asong 500 tơpu tơmam, rim tơpu đei tơmam drăm xa kăl (đei kơjă 300 rơbâu hlj) ‘măn asong ăn kon pơlei đei tơdrong hơrih tơnap tap, bơngai hơven hơvo, bơngai kră ưh đei ‘nhŏng oh hơrih hơdrô̆ tơ̆ pơlei tơm Buôn Ma Thuột.

Tơdrong jang oei lơ̆m tơchơ̆t Puih mak ‘mêm kơ-eng – têt vang glơng kơyuơ đe mơlôh Đăk Lăk tơlĕch jang lơ̆m jâ̆p dêh char. Kiơ̆ kơ noh, atŭm hăm tơdrong tơgŭm kơyuơ dôm anih jang đoan apŭng, thĭ xah, pơlei tơm chă hơvơn, Anih jang đoan dêh char adoi hơvơn hloh 1,2 tih hlj păng jang hadoi hăm dôm anih jang ‘mêm bơnat lơ̆m tơring, anih jang tơgŭm tơpôl năm hơpong, asong tơmam ăn đe hơdruh tơdăm pơm jang ah kơmăng tơkuh sơnăm. ‘Nâu jing tơdrong jang kăp gĭt hơyak truh dôm bơngai tơnap tap vă tơgŭm ăn đe yĕt gơh đei sơng têt nguyên đan tơnŏ, chơt hơ-iă hloh.