Tơ̆ jơ bơ̆ jang, bơngai tang măt ăn dôm anih jang kơpal kơ dêh char Đắk Lắk pơma tơlĕch lơ tơdrong pơmat tat păng athei trung ương set hơlen, hơmet pơ ‘lơ̆ng vă jang tŏk mŭk drăm, tơpôl tơ̆ tơring tơ̆ hơnăp kơnh.

Pơma găh dôm tơdrong tơhlăk tăk lơ̆m tơdrong jang atŏk tơiung chă tơmang lăng tơ̆ tơring, ƀok Lại Đức Đại, Phŏ Kơdră Anih vei lăng jŏh ayŏ kơ dŏ xoang, tpơplŏng kơdâu păng chă tơmang lăng dêh char Đắk Lắk akhan, dôm dêh char Tây Nguyên, lơ̆m noh đei Đắk Lắk đei lơ tơdrong ‘lơ̆ng vă atŏk tơiung chă tơmang lăng lơ̆m tơpôl, chă tơmang lăng găh choh jang xa – tơring tơrang. Mă lei hrei ‘nâu oei tam mă đei tơdrong hơgăt rơđăh găh tơdrong tơplih teh choh jang xa jing teh pơvih pơvăn kơna lơ anih chă tơmang lăng ưh pơ̆n tơmât lơ jên ăn tơdrong jang ‘nâu. 

Tơ̆ jơ bơ̆ jang, dôm bơngai tang măt kŭm pơma apinh găh lơ tơdrong ƀơm truh: choh jang xa, sir iŏk tơmam kăp gĭt lơ̆m teh, găh ƀao hiêm, tư phap, unh điên… Khul tang măt Quốc hội dêh char Đắk Lắk chih akŏm đĭ nơ̆r tơgop, nơ̆r apinh đơ̆ng dôm bơngai tang măt, hơmet mă ‘lơ̆ng vă tơroi ăn Quốc hội păng dôm anih Anih set hơlen.