Kơ sơ̆ 10/11, tơ̆ Hà Nội, ƀok Trần Tuấn Anh, Bơngai jang lơ̆m Anih tơm Chĭnh trĭ, Kơdră Anih jang Mŭk drăm Trung ương, tang măt Trung ương Đảng bơ̆n, hlôi sơng khŭl tang măt gĭt kăl Đảng Cộng sản Pê-ru. Ƀok Trần Tuấn Anh pơma hơdăh Đảng Cộng Sản Việt Nam ling lang lăng kăl, ‘meh vă ưh kơ pơdơh hơmet ming păng hơtŏk loi dơ̆ng tơdrong pơvei jang hơdai hăm dôm teh đak, dôm đảng đei tơdrong  pơvei joăt joe, lơ̆m noh đei Đảng Cộng sản Pê-ru kiơ̆ lơ̆m tơdrong tơgoăt hơdai jơhnơr arih, đei yua lei lăi băl păng athei jang hơdai lơ̆m tơdrong ‘nao yua kơ tơdrong đei yua đơ̆ng kon pơlei 2 teh đak, yua kơ tơdrong rơngei, jang hơdai păng hơtŏk tơiung tơ̆ tơring păng apŭng plĕnh teh.

Tổng Bí thư Đảng Cộng sản Pê-ru Lu-ít Vi-gia-nu-ê-va pơma hơdăh Đảng Cộng sản Pê-ru ling lang lăng kăl tơdrong pơvei joăt joe, tơgoăt tơgoăl hăm Đảng Cộng sản Việt Nam; pơkăp hơnơ̆ng tơgop lơ̆m tơdrong pơtrŭt tơdrong vei tơbôl păng jang hơdai ‘lơ̆ng hơiă đơ̆ng 2 Đảng, 2 teh đak păng kon pơlei 2 teh đak tơ̆ hơnăp kơnh.