Tơ̆ jơ tơƀơ̆p, bơngai tăh hla pơlei tơm Ngã Bảy tơbăt jơhngơ̆m đon chơt hơ iă tơ̆ hơnăp dôm tơdrong jơnei mă lơ̆m teh đak vei kơjăp păng iŏk đei lơ̆m 6 khei au ki, adoi hôn bơnê pơtôch ‘lơ̆ng hơ iă ‘Măng hop akŏm au hăm dôm tơdrong tơchơ̆t trŏ lăp.

Bơngai tăh hla pơlei tơm Ngã Bảy ‘meh vă Kuô̆k hô̆i păng Khul kơdră Teh đak hơnơ̆ng lăng ba kơjăp rim trong bơ̆jang vă pơm sơđơ̆ng kơjă tơmam drăm choh jang sa, pơjing sơđơ̆ng tĕch mơdro tơmam drăm choh jang sa, tơchă hơnih răt iŏk lơ rim tơmam drăm choh jang sa, veh ver gơnang lơ̆m mĭnh ƀar teh đak; đei trong jang hơvơn bơngai jang, pơjing tơdrong jang ăn sinh viên ‘nao lech ‘măng khoă, đei trong tơgŭm djru krao hơvơn tơmơ̆t jang hăm khul bơ̆ jang pơgang; lăng hơlen dơ̆ng rim tơdrong tơchơ̆t ưh kơ ăn kang ƀô̆ đei teh choh jang sa ... Jơ ‘năr au, Kơ iĕng kơdră chĕp pơgơ̆r Kuô̆k hô̆i Trần Thanh Mẫn tang măt ăn Khul kơdră tang măt Kuôk hô̆i dêh char Hậu Giang pôk ăn 20 pơbŭng hnam Tơgoăt tơgoăl hăm akŏp kơjă kơjên 1 ti hlak jên ăn rim ŭnh hnam dơnuh oei lơ̆m pơlei tơm Ngã Bảy, dêh char Hậu Giang.