Kŏng ty Chehphe 15 găh Quân khu 5 dang ei vei lăng năng tông hloh 820ha chehphe păng 130ha ksu. Akŏp jang sa iŏk đei lơ̆m sơnăm dang 150 ti hlak jên, tơdrong hơrih sa kơ bơngai jang atŏk ‘lơ̆ng, jang sa iŏk đei jô̆ hơtŏ rim khei lơ̆m 1 ‘nu bơngai đei truh 9 triu 200.000 hlak jên. Atŭm hăm tơdrong jang mŭk drăm, Kŏng ty oei vang iung jang pơtho pơhrăm, kơchăng iung tơblăh; tang găn tŏ ‘mi kial pơrăm, tơchă tơgŭm dŏng păng tang găn pơrang jĭ; tơlĕch jang kơtang tơgŭm djru kon pơlei kon kông lơ̆m tơring jang tơjur dơnuh kơjăp ‘lơ̆ng; vang kơrŭn tơ iung pơjing tơring tơrang ‘nao lơ̆m tơring mă hơnih oei. Tơ̆ jơ bơ̆ jang, Kơ iĕng Kơdră chĕp pơgơ̆r Kuô̆k hô̆i, Thượng tướng Trần Quang Phương pơrô̆ athei Kŏng ty hơnơ̆ng sơkơ̆t hơdăh trong atŏk tơ iung lơ̆m chăl hle; jang ‘lơ̆ng hlŏh dơ̆ng bơ̆ jang tơ iung pơjing Đảng, tơ iung pơjing hơnih pran kơjăp iăp kơtang tôm tong; jang ‘lơ̆ng bơ̆ jang pơrô̆ pơrôp, vang kơrŭn jơhngơ̆m tơ iung pơjing tơring kăl tơ̆ tơring Tŏk bŏk-Tây Nguyên.