Iung pơma tơ̆ hop akŏm, Kơ iĕng Kơdră chĕp pơgơ̆r Kuô̆k hô̆i Trần Quang Phương pơma hơdăh, Kuô̆k hô̆i hlôi pơdrơ̆ng kiơ̆ Tơdrong tơchơ̆t găh khul kơdră tơring kơdrơ̆m păng jang pơlong năng mĭnh ƀar trong jang kăl atŏk tơ iung pơlei tơm Đà Nẵng.

Tơdrong tơchơ̆t ou tôch gĭt kăl, pơjing trong jang trŏ lăp vă Đà Nẵng iung jang dôm tơdrong đei, rơvơn, atŏk kơtang găh mŭk drăm-tơpôl, jang kiơ̆ ‘lơ̆ng rim trong tơlĕch jang tơ̆ Tơdrong tơchơ̆t kơsô̆ 43 đơ̆ng Hơnih tơm Chinh trĭ găh tơ iung pơjing păng atŏk tơ iung pơlei tơm Đà Nẵng truh sơnăm 2030, lăng truh sơnăm 2045. Kơ iĕng Kơdră chĕp pơgơ̆r Kuô̆k hô̆i Trần Quang Phương pơkă, tơdrong pơgơ̆r jang kiơ̆ Tơdrong tơchơ̆t hăm trong jang kăl, lơ̆m lơ tơdrong jang jei gô đei tơdrong long tih tên ăn pơlei tơm, mă kăl hăm Jơnŭm vei lăng kon pơlei kơ pơlei tơm pơđĭ găh tơdrong ‘lơ̆ng pơjing tơdrong tơchơ̆t adoi nhen iung jang tơ iung pơjing. Găh trong jang lơ̆m jang pơlong năng pơjing Hơnih mơdro sa hiôk hian tơ̆ Đà Nẵng, Kơ iĕng Kơdră chĕp pơgơ̆r Kuô̆k hô̆i Trần Quang Phương pơma hơdăh, vă iung jang hrôih păng pơjing đei Tơdrong tơchơ̆t kơsô̆ 43 athei Jơnŭm vei lăng kon pơlei, rim Hơnih jang Jơnŭm vei lăng kon pơlei kăl vang iung jang đơ̆ng hrôih hloi.