Tơ̆ pơgê, khul bơ̆ jang năm ngôi, hmach Têt păng pôk tơmam drăm ăn kang ƀô̆, ƀô̆ đô̆i Kơđông Ƀô̆ đô̆i vei lăng sơlam teh đak Tuy Đức (Khul Ƀô̆ đô̆i vei lăng sơlam teh đak dêh char); Đại đội Bộ binh 3 (Khul Ƀô̆ đô̆i apŭng Tuy Đức). Jơ ‘năr ou, khul bơ̆ jang kơ Trung ương hlôi pôk ăn 50 tơnô̆ tơmam drăm ăn rim ŭnh hnam tơnap tap păng 20 tơnô̆ tơmam drăm ăn đe hơ ioh ‘noh kon mŏm kơđông. Tơ̆ kơsơ̆, Kơ ieng Kơdră chĕp pơgơ̆r Kuôk hô̆i Trần Quang Phương atŭm hăm khul bơ̆ jang Trung ương hlôi năm ngôi, hmach Têt ăn kang ƀô̆, ƀô̆ đô̆i, kon pơlei tơ̆ tơring tơnap tap Dak Ngo, apŭng Tuy Đức, dêh char Dak Nông. Kơ iĕng Kơdră chĕp pơgơ̆r Kuô̆k hô̆i hôn bơnê tơdrong khul kơdră tơring hlôi hơdrin jang ‘lơ̆ng bơ̆ jang vei lăng năng tông Têt ăn kon pơlei. Apĭnh jet gia pơma dơnuh, hmach têt ăn rim kră pơlei, bơngai đei kon pơlei lui yom ‘noh bơngai kon kông, Kơ iĕng Kơdră chĕp pơgơ̆r Kuô̆k hô̆i pơma hơdăh hơnăp jang kơ kră pơlei, dôm bơngai đei kon pơlei lui yom ‘noh kăl hloh. ‘Nou jĭ khul tơm dơnơm, tơgop hơnhăk trong bơ̆ jang đơ̆ng Đảng, Khôi luơ̆t Teh đak truh hăm kon pơlei, adoi vang iung jang kiơ̆ kơjăp lơ̆m tơ iung pơjing tơpôl tơgoăt tơgoăl pôm nơ̆r ƀơ̆r đon lơ̆m kon pơlei.