Dôm năr vă jê̆ Têt, yă H’Chớt Niê, bơngai Ê Đê, tơ̆ plei Tai, xăh Krông Jing, apŭng M’Đrắk, kŭm hăm ŭnh hnam hăt hot hơpuih hơmet rơgoh hnam oei. Yă tơroi, tam mă đei lai yơ jơhngơ̆m đon sơng Têt kơ ŭnh hnam đei chơt hơiă nhen sơnăm ‘nâu.

"Khei 6/2024, Anih pơgơ̆r khŭl lĭnh apŭng M’Đắk hlôi asong ŭnh hnam 50 triệu hlak jên, Anih jang Mặt trận Tổ quốc Việt Nam apŭng tơgŭm dơ̆ng 50 triệu hlak jên. Hnam nhôn mong akŏm păng tŏk iŏk dơ̆ng vă man ‘nao să 90 m2. Dang ei, dôm bơngai lơ̆m ŭnh hnam hlôi đei hnam kơjăp ‘lơ̆ng vă oei. Tết Ất Tỵ 2025 âu, đĭ đăng hnam nhôn sơđơ̆ng jơhngơ̆m sơng pơyan Puih mak, ‘nâu rŏ lăng jing năr Têt chơt hơiă păng ‘nă hal hloh đơ̆ng sơ̆ truh dang ei.”

Kŭm nhen yă H’Chớt, ‘nhŏng Y Sam Niê, bơngai Ê Đê, hơrih tơ̆ plei Tai, chơt hơiă sơng Têt lơ̆m hnam ‘nao man. ‘Nhŏng Y Sam hrĭ jơhngơ̆m pơma: "Tam mă đei lai yơ ĭnh tơchĕng gô pơm đei hnam ‘nao ‘lơ̆ng vă oei. Anih pơgơ̆r khŭl lĭnh apŭng păng Anih jang Mặt trận Tổ quốc apŭng 1 anih jang asong 50 triệu hlak jên, hnam nhôn tŏk iŏk dơ̆ng 50 triệu hlak jên vă man hnam să hloh 60 m2. Sơnăm ‘nâu đei hnam ‘nao sơng Têt, klo kăn nhi păng đe kon chhôk hơiă dêh, ưh pă bơngơ̆t kơ ‘mi hngăt, kial tơ hlu. Dang ei nhôn lăp bơngơ̆t kơ jang sa hơtŏk tơiung mŭk drăm, rong kon hơ ‘lơ̆p hŏk pơhrăm đĕch bơih”.

Ƀok Y Lương Êban, Kơdră Anih jang Mặt trận Tổ quốc Việt Nam xăh Krông Jing roi tơbăt, lơ̆m sơnăm 2024, xăh đei 54 ŭnh hnam dơnuh hin đei man asong hnam “tơgoăt tơgoăl”. Hơdai hăm ‘noh, hloh 400 ŭnh hnam vă jê̆ dơnuh hin, bơngai kon kông đei tơgŭm jên păng bơngai jang pơm hơmet ming hnam oei ‘moi kiơ̆ dôm tơdrong jang đơ̆ng Khŭl kơdră teh đak păng dêh char Đắk Lắk. Dôm ŭnh hnam hlôi mơ̆t oei lơ̆m hnam ‘nao sơđơ̆ng tơdrong hơrih sa ngăl bơih.

Ƀok Y Lương roi tơbăt: "Hơtuch sơnăm 2024, Anih vei lăng kon pơlei xăh hlôi năm dăr lăng păng hơlen lăng tôm đang kơ ‘noh pơgơ̆r pơjao hnam ăn kơ dôm ŭnh hnam teh đak tơgŭm đei tơgŭm pơm hnam. Kiơ̆ đơ̆ng băt tơdrong, nhôn lăng ƀôh đĭ đăng dôm ŭnh hnam chơt hơiă, ‘nă hăl ngăl. Dôm ŭnh hnam hlôi hơmet ăn tôm sơng Tết Nguyên đán Ất Tỵ sơnăm 2025 lơ̆m jơhngơ̆m đon chhôk ‘nă đơ̆ng kon pơlei.”

M’Đrắk jĭ 1 lơ̆m dôm apŭng hơtăih hơtŏ mơmat tat hloh dêh char Đắk Lắk. Jang kiơ̆ tơdrong krao hơvơn “Đĭ đăng lơ̆m teh đak vang tơgŭm yua kơ bơngai dơnuh hin, ưh kơ lê̆ bu đei hŭt lê̆ tơ̆ rŏng” kiơ̆ athei đơ̆ng Khŭl kơdră teh đak găh tơdrong sut hnam pơgia, hnam hiăh hiot, sơnăm 2024, apŭng hlôi hơvơn rim kon jên man ‘nao 255 tŏ hnam păng pơm hơmet ming 190 tŏ hnam oei tơgŭm dôm ŭnh hnam dơnuh hin, vă jê̆ dơnuh hin. Akŏp jên bơ̆jang vă jê̆ 50 ti hlak jên. Găh trong tơlĕch jang sut hnam pơgia, hnam hiăh hiot lơ̆m sơnăm 2025, ƀok Y Khoan Niê Kđăm - Kơdră Anih jang Mặt trận Tổ quốc Việt Nam apŭng M’Đrắk roi tơbăt, apŭng tơchĕng hơdrol man ‘nao hloh 220 tŏ hnam tơgŭm dôm ŭnh hnam mơmat tat: “Nhôn kăl 18 ti hlak jên vă bơ̆jang tơdrong sut hnam pơgia ăn kơ kon pơlei lơ̆m apŭng sơđơ̆ng tơdrong hơrih sa lơ̆m sơnăm 2025. Mặt trận apŭng gô tơgep hơdai dôm tơdrong jang nhen Tơchơ̆t 90/QĐ-2022 đơ̆ng Thủ tướng teh đak, tơdrong jang 1718 găh sut hnam pơgia păng dôm tơdrong jang nai nhen jên krao hơvơn anih mơdro sa vă tơgŭm kon pơlei. Trong tơlĕch jang âu tơchĕng hơdrol gô jang đang lơ̆m khei 12/2025.”

Kơkuh chơt hơiă tơbăt 120 sơnăm Năr pơjing dêh char Đắk Lắk hơtuch khei 11 sơnăm 2024 âu ki, Anih jang Mặt trận Tổ quốc Việt Nam dêh char hlôi krao hơvơn pơm hnam tơgoăt tơgoăl ăn kơ ŭnh hnam dơnuh hin, ŭnh hnam mơmat tat găh hnam oei tơ̆ găh pơlei pơla kơ dôm xăh mơmat tat dêh hloh, tơring sơlam, tơring kon pơlei kon kông. Tơdrong krao hơvơn hlôi đei dôm bơngai đei jơhngơ̆m đon ‘lơ̆ng, dôm khŭl jang, anih mơdro sa, kang ƀô̆, bơngai jang teh đak tơgŭm hloh 23 ti hlak jên, pơjao hloh 300 tŏ hnam ăn ŭnh hnam dơnuh hin hơdrol kơ  Tết nguyên đán Ất Tỵ. Lơ̆m dôm hnam ‘nao đei pơjao, jơhngơ̆m đon sơng têt tŏk bŏk rơ ông rơ ang kŭm hăm tơdrong hiôk chơt đơ̆ng rim ŭnh hnam kon pơlei. Dôm hnam “Tơgoăt tơgoăl” tŏk bŏk pơm tơdrong ‘lơ̆ng vă kon pơlei hơnơ̆ng jang sa, yak tŏk klăih đơ̆ng dơnuh hin, pơjing tơdrong hơrih sa phĭ tơnŏ, hiôk chơt.