Iung pơma tơ̆ ‘măng tơƀơ̆p, Kơ iĕng kơdră chĕp pơgơ̆r Trần Thanh Mẫn hôn bơnê dôm tơdrong iŏk đei jơnei gĭt kăl kơ Khul jang mŭk drăm Joh ayŏ Việt Nam lơ̆m khei năr au ki. Kơ iĕng Kơdră chĕp pơgơ̆r Kuô̆k hô̆i pơma hơdăh, trong jang trŏ lăp đơ̆ng Đảng, Teh đak bơ̆n ‘nŏh atŏk tơ iung joh ayŏ tơklep hăm atŏk tơ iung mŭk drăm, hăm tơdrong gơ̆h hơgei păng hơtŏ hơnơ̆ng tơpôl.

Mă kăl, Khôi luơ̆t Mŭk drăm gĭt kăl joh ayŏ ‘nŏh tơdrong tơchơ̆t kăl hloh, pơjing đei tơdrong pơkăp vei lăng năng tông, atŏk tơ iung mŭk drăm joh ayŏ păng atŏk kơtang bơ̆ jang teh đak vei lăng, hơtŏk hơnăp jang kơ Kon pơlei lơ̆m tơdrong vei răk tơƀăk mong păng atŏk tơ iung tơdrong gĭt kăl joh ayŏ kơdŏ soang.