Kiơ̆ đơ̆ng Kơ iĕng Kơdră chĕp pơgơ̆r Teh đak, dêh char Quảng Nam ‘noh groi teh hiong răm kơtang hloh lơ̆m chăl sơnăm tơblăh vang hrang tơƀet sơ̆. Tơ̆ au đei hlŏh 65.000 ‘nu bơngai nuih mơng lôch dŏng teh đak, 15.339 ‘nu Yă mĕ Việt Nam nuih mơng hăm 45.500 ‘nu bơngai đei iŏk yua ăn teh đak.

Kơ iĕng Kơdră chĕp pơgơ̆r Teh đak Võ Thị Ánh Xuân athei dêh char Quảng Nam ‘nao akŏm hơmet pơ ‘lơ̆ng dôm tơdrong tim mă ‘lơ̆ng hlôi đei rim Khul jang dăr lăng, lăng hơlen kơ Trung ương tơƀôh ăn, mĭnh păh jei hơdrin jang keh đang rim trong tơlĕch jang lơ̆m jăl jang 2021 -  2025, đơ̆ng noh pơjing đei hơyak pran lơ̆m jăl jang atŏk tơ iung ‘nao. Ƀlep lơ̆m jơ ‘năr au, Kơ iĕng Kơdră chĕp pơgơ̆r Teh đak Võ Thị Ánh Xuân pơjao kơƀang pơtih ăn pôk ăn dêh char Quảng Nam ming man 10 pơbŭng hnam ‘Mêm mơnat, akŏp kon jên 500 triu hlak jên; pôk ăn 200 tơnô̆ tơmam drăm Têt ăn ŭnh hnam đei iŏk yua ăn teh đak păng ŭnh hnam dơnuh tơ̆ dêh char Quảng Nam; pôk ăn 200 tơnô̆ tơmam Têt tơgŭm djru kŏng nhân ŭnh hnan tơnap tap păng 200 triu hlak jên tơgŭm ăn hơ ioh tơnap tap tơ̆ dêh char Quảng Nam.