Tơ̆ jơ tơƀơ̆p, Kơ iĕng Kơdră chĕp pơgơ̆r Teh đak Võ Thị Ánh Xuân pơma tơbăt chơt hơ iă Việt Nam - Hàn Quốc tŏk bŏk lơ̆m jăl trong atŏk tơ iung ‘lơ̆ng hơ iă; mă kăl, yak năm ngôi dih băl kon pơlei ƀar teh đak ‘lơ̆ng hơ iă hăm dang 200.000 ‘nu kon pơlei kơ teh đak tok bŏk hơrih sa, hŏk pơhrăm păng bơ̆ jang tơ̆ teh đak dih băl, lơ̆m au đei dang 80.000 ŭnh hnam klo akăn Việt- Hàn.

Kơ iĕng Kơdră chĕp pơgơ̆r Teh đak athei, khei năr kơnh, ƀar păh iung jang hơdoi tơlĕch jang kiơ̆ ‘lơ̆ng hơ iă tơgoăt tơgoăl “Jang hơdoi tôm tong Việt Nam - Hàn Quốc”, mă kăl ‘nŏh jang kiơ̆ “Tơdrong jang găh tơlĕch tơgoăt tơgoăl jang hơdoi gĭt kăl tôm tong Việt Nam - Hàn Quốc” hlôi kĭ pơkăp lơ̆m khei 6/2023. Adoi atŏk kơtang tơgoăt tơgoăl chinh trĭ-tơbôl ‘moi kiơ̆ pơtrŭt ăn khul kơdră kơpal păng rim hơnih jang năm ngôi dih băl, kiơ̆ đơ̆ng noh hơmet pơ ‘lơ̆ng jơhngơ̆m đon lui chinh trĭ păng pơm kơtang hlŏh dơ̆ng tơgoăt tơgoăl ƀar păh Kơdră kơpal ƀar teh đak; tơlĕch jang kiơ̆ jơnei rim tơdrong jang hơdoi, rim tơdrong drơ̆ng mĭnh nơ̆r kơdră kơpal kơ ƀar teh đak.