Iung pơma tơ̆ jơ tơƀơ̆p, Kơ iĕng Kơdră chĕp pơgơ̆r Teh đak Võ Thị Ánh Xuân pơma hơdăh, lăng dơ̆ng chăl sơnăm tơ iung pơjing păng vei lăng teh đak kơ hơdrĕch hơdrung Việt Nam, ling lang đei tơdrong hiong răm, plang ăn tih tên đơ̆ng rim jơhnơr đe drŏ kăn atŭm dih băl tơgoăt tơgoăl, vang tơgop jơhngơ̆m đon tơ iung pơjing păng vei lăng teh đak.

Lơ̆m dôm sơnăm au ki, Teh đak Việt Nam ling lang jang kiơ̆ ‘lơ̆ng rim trong jang tơgŭm djru vă sơđơ̆ng ăn tơdrong pơm tơm kơ dih kơ đe drŏ kăn, pơtrŭt kơtang hơtŏ hơnơ̆ng drŏ nglo drŏ kăn păng tơdrong gơ̆h hơgei kơ đe drŏ kăn. Hrei au, tơ̆ Việt Nam, drŏ kăn tơmơ̆t hloh 50% măt bơngai lơ̆m teh đak păng tŏk bŏk hơnơ̆ng vei kơjăp hơnăp jang lơ̆m tơdrong jang tơ iung pơjing păng tơplih ‘nao teh đak. Jei tơ̆ pơgơr au, Kơ iĕng kơdră chĕp pơgơ̆r teh đak pơma tơbăt jơhngơ̆m đon hôn bơnê păng hơmŏ, rim kơdră drŏ kăn pơm Kơdră tang măt Teh đak, kơdră chĕp pơgơ̆r rim Hơnih bơ̆ jang apŭng plĕnh teh gô hơnơ̆ng yak hơdoi, jang hơdoi, tơgum djru Việt Nam jang kiơ̆ jơnei ‘măng tơplih ‘nao păng vang mơ̆t hơdoi apung plĕnh teh, lơ̆m au đei rim trong jang găh hơtŏ hơnơ̆ng drŏ nglo drŏ kăn păng pơjao hơnăp jang ăn drŏ kăn.