Kơ iĕng Kơdră chĕp pơgơ̆r Teh đak Võ Thị Ánh Xuân, Kơ iĕng Kơdră Jơnŭm pơlong pôk hơpăh Trung ương vang năm hop akŏm. Hơnơ̆ng tơgoăt dôm tơdrong iŏk đei jơnei lơ̆m dôm sơnăm au ki, sơnăm 2024, Pơlei tơm Hải Phòng tơlĕch tơdrong jang tŏk mŭk drăm-tơpôl kơtang hloh hăm rim trong tơlĕch jang kơtang hloh sơnăm 2023, lơ̆m au đei: tŏk lơ tơmam drăm jang sa lơ̆m pơlei tơm GRDP đơ̆ng 11,5% - 12%; Kơsô̆ pơm tơlĕch tơmam drăm hnam kmăi pơm tơlĕch IP tŏk 15%; Akŏp thuê̆ ăn hơnih mong jên jang Teh đak lơ̆m pơlei tơm iŏk đei hlŏh 106.761 ti hlak jên; hơvơn teh đak đe tơmơ̆ jang iŏk đei đơ̆ng 2 - 2 ti 500 triu dolar.

Vă jang keh đang trong tơlĕch jang, pơlei tơm Hải Phòng hlôi tơlĕch mĭnh ƀar tơdrong jang păng trong vă jang kăl, lơ̆m au akŏm pơ̆ih să tơdrong jang mŭk drăm, tơplih ‘nao trong tŏk kơtang, hơmet ming tơdrong jang mŭk drăm kiơ̆ trong atŏk tơ iung 3 tơdrong jang tơm ‘noh: pơm tơlĕch tơmam drăm kmăi kmŏk hơgei, dơnŏk đak dơsĭ-logistics, tơmang pơhiơ̆-Mơdro sa; atŏk kơtang hơmet pơ ‘lơ̆ng tơdrong bơ̆ jang hla bơar, tư phap, jang kiơ̆ hơmet ming hơnih bơ̆ jang teh đak tơ̆ apŭng, tơring, tang găn sa pơgơ̆m pơjĭp, jang kiơ̆ pơkom, tang găn brăh brư.