Iung pơma tơ̆ jơ bơ̆ jang, Kơ iĕng Thủ tướng Bùi Thanh Sơn hôn bơnê dôm tơdrong hơdrin tơ iung pơjing trong tŏk mŭk drăm kơ Gia Lai păng Kon Tum, mă lei athei trong iung jang kăl trŏ lăp, akŏm ƀơ̆t măt păng đunh đai. Rim tơring kăl iung jang hơdoi ‘lơ̆ng hơ iă hăm rim hơnih tơm, hơnih jang vă hơmet pơ ‘lơ̆ng tơnap tap lơ̆m rim tơdrong vă jang tim mă keh đang, mă kăl lơ̆m tơdrong jang ŭnh hơyuh. Kơ iĕng Thủ tướng tơƀôh hơdăh rim tơdrong joăt joe nhen choh jang sa, bri ‘long, joh ayŏ oei sa, tơmang pơhiơ̆ kăl iung jang ‘lơ̆ng hloh dơ̆ng. Lơ̆m choh jang sa, ƀar dêh char kăl atŏk kơtang jang kiơ̆ kmăi kmok hơgei vă pơjing đei tơmam drăm ‘lơ̆ng, mă kăl hăm Sâm Ngŏk Linh kơ Kon Tum kăl lăng truh pơjing hnam kmăi pơm tơlĕch pơgang tih nhen kơ Hàn Quốc. Kơ iĕng Thủ tướng athei dêh char Gia Lai păng Kon Tum kăl kơrŭn kơtang hloh dơ̆ng, trong jang tih hloh dơ̆ng, iung jang kơjăp hăm rim hơnih tơm, hơnih bơ̆ jang vă yak hloh tơdrong long, iung jang ‘lơ̆ng dôm tơdrong đei, sơđơ̆ng vei lăng teh đak păng atŏk tơ iung kơjăp.