Iung pơma tơ̆ hop akŏm, Kơ iĕng Thủ tướng Teh đak Nguyễn Hòa Bình athei BIDV chă tơchĕng, hơlen hơdăh, tơdra hơdrol rim trong vă jang, trong jang vă tơ iung pơjing BIDV đei jing mĭnh Hơnih mơdro sa Tơmơ̆t jên jang Teh đak tơm dơnơm tih tên, bơ̆ jang jơnei, kĕ pơjei hăm apŭng plĕnh teh. BIDV kăl hơnơ̆ng jang kiơ̆ ‘lơ̆ng hơnăp jang kơ Hơnih mong jên Mơdro sa kơ Teh đak: chĕp kơ̆l, iung jang ‘lơ̆ng chông ba bơ̆ jang. Kơrŭn đĭ ai păng pơm jŭk yŭk trong hơlou lơ̆m jang kiơ̆ rim trong bơ̆ jang đơ̆ng Đảng, Khul kơdră Teh đak, Hơnih mong jên Teh đak Việt Nam. Tơgĕch kiơ̆ khul jang, bơ̆ jang ‘lơ̆ng păng đei tơgoăt hăm teh đak đe, hơvơn đei lơ kon jên hu tơgŭm ăn atŏk tơ iung mŭk drăm; tơlĕch jang lơ trong jang ăn asong tŏk iŏk hăm rim tơdrong vă jang tih, lang să kơtang, đei lui yom kơtang lơ̆m tơdrong jang mŭk drăm.