Kơ iĕng Thủ tướng Lê Minh Khái hôn bơnê tơdrong jang tơmơ̆t jên jang mơdro sa iŏk đei jơnei kơ Grŭp jang lơ̆m rim tơdrong jang kmăi kmŏk, tơ iung pơjing ming man, mơdro sa, kmăi kmŏk kơtơ̆ng ang ..., adoi nhen rim tơdrong jang lăng tông tơpôl đơ̆ng Grŭp jang, đơ̆ng noh, tơgop kơtang lơ̆m atŏk tơ iung mŭk drăm-tơpôl kơ Việt Nam.

Đơ̆ng sơnăm 2007, Grŭp jang Hyosung hlôi tơmơ̆t jên jang tơ̆ Việt Nam hloh 4 ti USD, hăm rim tơdrong jang: Kmăi kmŏk pơm tơlĕch tơmam drăm ming man, kmăi kmŏk tanh che, kmăi kmŏk hoă hŏk, ŭnh hơyuh hơnih jang kmăi kmŏk. Kơ iĕng Thủ tướng Lê Minh Khái hơpơi ‘meh Grŭp jang chă lăng hơlen mă brĕ hloh dơ̆ng, hơnơ̆ng tơmơ̆t jên jang lơ̆m dôm tơdrong mă Grŭp kĕ jang; sơkơ̆t hơdăh, Khul kơdră teh đak Việt Nam lăng ba, lăng kơjăp tơdrong hơmet pơ ‘lơ̆ng trong tơmơ̆t jên jang, pơjing rơvơn ăn Grŭp jang tơmơt jên jang mơdro sa jơnei păng atŏk tơ iung kơjăp ‘lơ̆ng.