Tơ̆ jơ tơbơ̆p, Kơ iĕng Thủ tướng sơkơ̆t hơdăh, Việt Nam lăng teh đak Mi ‘noh teh đak jang hơdoi gĭt kăl hloh păng ‘meh vă atŭm hăm Mi hơnơ̆ng chông ba tơdrong tơgoăt tơgoăl ‘nao kơtang hloh dơ̆ng, jơnei hloh dơ̆ng ‘moi kiơ̆ trong lui yom dih băl pơm tơm kơdih, keh kong groi teh, trong jang chinh trĭ kơ dih băl, hơnhăk đei iŏk yua ‘lơ̆ng hơ iă ăn kon pơlei ƀar teh đak păng tơgop ăn rơngei hiôk hian, sơđơ̆ng, jang hơdoi, atŏk tơ iung tơ̆ tơring păng apŭng plĕh teh. Kơ iĕng Thủ tướng ‘meh vă teh đak Mi hơnơ̆ng lăng ba păng atŏk kơtang khul jang tơgŭm djru Việt Nam, tơplih yuh soh, tơplih rơgoh ‘lơ̆ng, iung tơjră hăm tơplih tŏ ‘mi kial, vei lăng năng tông xem bri brăh. Ƀar păh pơma dơnuh găh tơdrong apŭng plĕnh teh păng tơring mă ƀar păh vang lăng truh, adoi drơ̆ng mĭnh nơ̆r tơdrong rim hơnih bơ̆ jang đei ƀơm truh kơ ƀar teh đak iung jang hơdoi kơjăp vă hơmet ăn rim tơdrong pơgơ̆r tơbăt 30 sơnăm pơjing tơbôl Việt Nam-Mi lơ̆m sơnăm 2025.