Hôn bơnê kơtang tơdrong jang ‘lơ̆ng kơ Grŭp jang gre Ô tô Geely Auto tơ̆ Trung Quốc păng hloh 50 teh đak lơ̆m apŭng plĕnh teh, Kơ iĕng Thủ tướng ‘meh vă trong vă jang hơdoi tơmơ̆t jên jang đơ̆ng Grŭp jang tơ̆ Việt Nam gô iŏk đei jơnei hơ iă. Chă pơma dơnuh găh mĭnh ƀar tơdrong kăl lơ̆m trong bơ̆ jang atŏk tơ iung trong nơnăm tơ̆ Việt Nam, Kơ iĕng Thủ tướng ‘meh vă tơdrong vă jang hơdoi tơmơ̆t jên jang kơ Geely Auto tơ̆ Việt Nam kăl đei tơlĕch jang tĕnh koăng, jang keh đang đơ̆ng chă tơchĕng, pơm tơlĕch, atŏk tơ iung, pơjao kmăi kmŏk, pơtho pơjing bơngai jang; adoi lăng ba kơjăp tronh tơdrong oei sa, jơhngơ̆m đon hŏk pơhrăm, jang pơgang ăn bơngai jang.