Pơprŏ jang dêh char Bình Thuận jăl jang 2021-2030, lăng truh sơnăm 2050 hlôi đei Thủ tướng teh đak kĭ tơchơ̆t ‘nŏh jing trong tơbăt ăn, jơhngơ̆m pran kăl lơ̆m atŏk tơ iung mŭk drăm-tơpôl, lăng truh trong tơlĕch jang Bình Thuận đei jing dêh char pran kơtang păng kơjăp ‘lơ̆ng.

Iung pơma tơ̆ pơm lêh, Kơ iĕng Thủ tướng Trần Hồng Hà pơma hơdăh: Tơdrong tơlĕch jang tôm tong, ‘lơ̆ng hơ iă Tơdrong tơchơ̆t 06 đơ̆ng Hơnih tơm Chinh trĭ găh pơprŏ, tơ iung pơjing vei lăng păng atŏk tơ iung kơjăp ‘lơ̆ng hơnih kơdrơ̆m Việt Nam truh sơnăm 2030, lăng truh sơnăm 2045 ‘noh tôch git kăl. Kơ yuơ pơprŏ dêh char Bình Thuận ‘nao lăp lơ̆m trong pơchoh trong đĕch. ‘Meh vă đei tơplih hơdăh păng hơlen tôm tong dôm tơdrong đei, ‘noh mă kăl ‘noh dêh char kăl jang kiơ̆ Tơdrong tơchơ̆t 06, lăng atŏk tơ iung tơring kơdrơ̆m ‘noh mĭnh lơ̆m dôm trong jang, trong tơlĕch jang, jơhngơ̆m pran vă hơkrop hơnih kơdrơ̆m hăm mŭk drăm hơnih kơdrơ̆m vă atŏk tơ iung dêh char.