Khei năr au ki, tơdrong yoch ma tuý oei hơnơ̆ng kơtang tơ̆ rim jăl trong kăl: jăl trong Đông Bắc, Tây Bắc, Tơring găh tu Tŏk bŏk - Tây Nguyên, Tây Nam, trong đak dơsĭ, trong gre păr. Hlŏh bơ̆ jang hơlen tơdrong, vei lăng kơjăp tơring iung tơjră hăm rim khul tĕch mơdro tơtông, chơ pơdŭ glăi ma tuý klŏh klĕch teh đak, lơ dêh char khul Kanh sat ma tuý hlôi dăr lăng, iung tơjră phă pơrăm lơ ‘măng đe tĕch mơdro ma tuý.

Iung pơma tơ̆ pơm lêh, Kơ iĕng Thủ tướng Trần Lưu Quang hmach chơt hơ iă dôm tơdrong jơnei mă khul Kanh sat ma tuý iŏk đei jơnei lơ̆m khei năr au ki. Kơ iĕng Thủ tướng athei khul Kanh sat tang găn ma tuý bơ̆ jang ‘lơ̆ng hlŏh dơ̆ng, pơtho tơbăt, pơrô̆ pơrôp hơnih vei lăng kon pơlei dêh char tơbăt ăn Jơnŭm vei lăng kon pơlei pơjing trong jang tơgum djru kon jên ăn bơ̆ jang tang găn ma tuý.