Kiơ̆ tơdra hơdrol, gơmăng năr 17/7, pơgê năr 18/7, kial hơbŭt kơsô̆ 1 tơhlu trŭh tơ̆ groi teh kơ teh đak bơ̆n. ‘Nau jĭ kial hơbŭt kơtang hloh lơ̆m 5 sơnăm kơ au. Iung tơjră tang găn hăm kial hơbŭt pơrăm, đơ̆ng 12 jơ ‘năr dơ̆ng năr 17/7, rim dêh char Quảng Ninh, Nam Định jang kiơ̆ tơchơ̆t ưh kơ năm tơ̆ đak dơsĭ, adoi pơdơ̆h hloi chă chơ brŏk năm kơ tơmoi tơ̆ rim hơnih tơmang pơhiơ̆. Hloh đơ̆ng dăr lăng rim hơnih hơmơt păng rim hơdrau rong ka hơdang tơ̆ đak dơsĭ kơ rim tơring, rŏ năng gô yông vă jê̆ 30.000 ‘nu bơngai rong ka hơdang năm oei tơ̆ hơnih sơđơ̆ng.

Khul ƀô̆ đô̆i Quân khu 3, Quân khu 4 hlôi păng tŏk bŏk akŏm tơgum kon pơlei chô̆ pơjră hnam; yông hơdrau rong ka hơdang; tơroi tơbăt ăn rim duk năm tơ̆ hơnih sơđơ̆ng păng hơmet pơ ‘lơ̆ng rim duk tơ̆ dơnŏk. Pơma pơtôch hop akom, Kơ iĕng Thủ tướng Trần Lưu Quang hôn bơnê tơdrong iung jang tơnăp đơ̆ng tơring lơ̆m tơjră tang găn hơlau, adoi athei rim hơnih tơm, hơnih jang păng tơring ‘nĕ pơhơi, jang kiơ̆ kơjăp Nơ̆r tơchơ̆t đơ̆ng Thủ tướng Teh đak găh tơjră tang găn kial hơbŭt kơsô̆ 1.