Kơ iĕng Thủ tướng hôn bơnê kơtang pơtôch jang hơdoi ƀar păh Hơnih tơm vei lăng Joh ayŏ kơdŏ soang, Đă ƀŏng lŏng tơplŏng kơdau păng Tơmang pơhiơ̆ Việt Nam hăm Hơnih tơm vei lăng Kơtơng ang, Jŏh ayŏ kơdŏ soang păng Tơmang pơhiơ̆ Lào, mă kăl lơ̆m pơgơ̆r rim tơdrong joh ayŏ, tơƀơ̆p dih băl kơ kon pơlei.

Kơ iĕng Thủ tướng Trần Lưu Quang athei ƀar hơnih tơm tơlĕch jang kiơ̆ jơnei Trong pơprŏ jang hơdoi Jŏh ayŏ kơdŏ soang, Tơmang pơhiơ̆ jăl jang 2021-2025 hlôi kĭ pơkăp; chă tơchĕng hơlen, tơlĕch jang rim trong jang pơtrŭt kơtang jang hơdoi tơmang pơhiơ̆ ƀar păh teh đak; iung jang hơdoi kơjăp lơ̆m pơgơ̆r rim tơdrong Jŏh ayŏ kơdŏ soang-tơpôl lơ̆m sơnăm Lào pơm Kơdră chĕp pơgơ̆r ASEAN; iung jang hơdoi kơjăp lơ̆m tơlĕch jang kiơ̆ rim tơdrong vă jang găh joh ayŏ kơdŏ soang, đă ƀŏng lŏng tơplŏng kơdau păng tơmang pơhiơ̆ kơ Việt Nam tơ̆ Lào.