Năr au, năr 6/6, Hop akŏm Mŭk drăm apŭng plĕnh teh St. Petersburg (Nga) ‘măng mă 27 yak mơ̆t lơ̆m năr bơ̆ jang mă 2. Pơgơ̆r blŭng a đei pơgơ̆r lơ̆m năr ou. Kơ iĕng Thủ tướng Trần Lưu Quang pơm tơm Khul tang măt Việt Nam vang năm hop akŏm păng iung pơma tơ̆ pơgơ̆r blŭng a. Hăm tơdrong tơm “Trong jang kơ apŭng plĕnh teh lơ pang-pơjing rim hơnih tŏk kơtang ‘nao”.

Lơ̆m pơgơ̆r hop akŏm, rim tơdrong găh jang hơdoi apŭng plĕnh teh păng chinh trĭ lơ̆m plei teh kiơ̆ joăt joe gô đei pơma dơnuh kơtang. Hop akŏm gô tơƀôh tơbăt rim tơdrong yan au vă mơdro sa đei iok yua kơ jăp păng atŏk tơ iung rim hơnih mơdro sa păh ai păng iĕ. ‘Ngoăih kơ ‘noh, tơ̆ hop akŏm đei dôm nơ̆r hơlen hơdăh păng rim trong jang tơgŭm ăn rim bơngai mơdro sa, rim trong tơlĕch ăn tơmơ̆t jên jang păng rim trong jang iŏk đei jơnei. Hop akŏm hăm đei lơ kơdră chĕp pơgơ̆r teh đak, kơdră chĕp pơgơ̆r rim hơnih mơdro sa păng khul khoa hŏk, tang măt ăn rim hơnih mơdro sa păh ai păng iĕ atŭm hăm 18.600 ‘nu kơdră đơ̆ng 139 teh đak lơ̆m plei teh.