Kiơ̆ tơbăt đơ̆ng Hơnih tơm Nội vụ, jang kiơ̆ hơmet ming khul chĕp pơgơ̆r bơ̆ jang Teh đak păng hơmet ming rim hơnih bơ̆ jang teh đak, rim tơring hlôi tơjur 13 hơnih jang tơ̆ dêh char păng hơnih jang anai găh Hơnih bơ̆ jang vei lăng kon pơlei dêh char; tơjur hloh 2.500 hơnih bơ̆ jang găh hơnih joăt jang kơ Hơnih vei lăng kon pơlei dêh char, apŭng; adoi hơnơ̆ng dăr lăng, hơmet ming dơ̆ng hơnih bơ̆ jang teh đak, jô̆ truh đĭ sơnăm 2023 hlôi pơm tơjur 7.800 hơnih bơ̆ jang teh đak.

Iung pơma tơ̆ Hop akŏm, Kơ iĕng Thủ tướng Trần Lưu Quang hôn bơnê kơtang dôm tơdrong hơdrin, iung jang kơtang đơ̆ng tơpôl kơdră chĕp pơgơ̆r, kang ƀô̆, bơngai jang păng dôm tơdrong iŏk đei jơnei kơ hơnih jang nội vụ lơ̆m sơnăm 2023, lơ̆m au đei lơ tơdrong jang tôch mơmat tat, hrat hrĭn.