'Nâu jing kơtơ̆ng ang đei tơbang ăh Hop akŏm bơngai jang tơroi tơbăt Trung ương khei 6/2023, kơyuơ Ƀan Twên yăo Trung ương pơgơ̆r ăh pơgê năr 16/6. Tơ̆ hop akŏm, tơroi tơtenh găh tơdrong pơm tơxŭl tơxăl tơpôl tơ̆ Đăk Lăk, Thiếu tướng Đặng Hồng Đức, Kơdră Anih jang kơ Anih tơm Kŏng an xơkơ̆t hơdăh, đơ̆ng rŏng kơ đei tơdrong, Anih tơm Kŏng an hlôi tenh kuăng pơtruh khul juăt jang, tơlĕch lơ trong jang vă pơvei dôm tơring đei tơrĕk, vei lăng anih jang kơ jơnŭm pơgơ̆r tơring, vei xơđơ̆ng tơpôl, xơđơ̆ng ăn kon pơlei păng chă rôp dôm bơngai chư̆ kơnê̆. Atŭm hăm noh, tenh kuăng chă tơgŭm tơtom, hơlêm đon bơnôh unh hnam đe đŏng chĭ lôch plang, rơka; năm apong hơlêm unh hnam kăn ƀô̆, kon pơlei ƀơm răm. Thiếu tướng Đặng Hồng Đức tơƀôh hơdăh, hăm tơchơ̆t khŏm mă chă rôp đei dôm bơngai pơm kơnê̆, truh dang ei khul kŏng an hlôi rôp păng xek tơlang hloh 50 'nu kơtă vang akŏm lơ̆m tơdrong pơm kơnê̆. Kiơ̆ đơ̆ng apinh jet mă blŭng, kơsô̆ bơngai ƀơm rôp vei mă lơ noh đe mơlôh, pơm kiơ̆ dôm tơdrong pơchŭt, tơdui lơ̆m mạng tơpôl păng pơchŭt pơm chere đơ̆ng bơngai Kinh păng bơngai kon kông... Tơdrong tơm kơyuơ pơhlŭ pơhlôm đơ̆ng khul ayăt chư̆ kơnê̆, khul Fulro hơrih xơlăh tơ̆ teh đak đe chă pơchŭt kon pơlei kon kông tơklăh chere bơngai Kinh hăm bơngai kon kông, pơm tơxŭl tơxăl kơ dêh păng pơm kơchĕng kư̆ kă gơh đei năm hơrih tơ̆ teh đak đe. Tơdrong mă âu, khul Kŏng an tŏk bŏk oei hơlen pơm hơdăh.       

Găh trong tơlĕch jang lơ̆m khei năr truh, Thiếu tướng Đặng Hồng Đức xơkơ̆t hơdăh, Anih tơm Kŏng an gô pơtoi chă rôp pơđĭ dôm bơngai pơm kơnê̆. Atŭm hăm noh vei xơđơ̆ng ăn kon pơlei păng khul vang jang chơ chă rôp; tơlĕch chă hơlen, xek tơlang tenh kiơ̆ trŏ nhen tơchơ̆t. Anih tơm Kŏng an pơkăl rim jăl pơgơ̆r tơring kơ dêh char Đăk Lăk, dôm dêh char Tây Nguyên păng tơring tơjê̆ tơrĕk tơnăp pơm kiơ̆ kơjăp tơdrong jang hơvơn tơroi hăm kon pơlei, tơguăt tơjê̆ kon pơlei, tơtom ƀôh băt dôm tơdrong mă kon pơlei pơngơ̆t kơ đon vă xek tơlang hrôih, đơ̆ng tơm hloi păng hơtŏk tơdrong kơchăng đơ̆ng kon pơlei hăm tơdrong pơhlŭ pơhlôm tơlĕch phă pơrăm, pơchŭt pơm tơklăh chere tơdrong tơguăt tơguăl kon pơlei đơ̆ng khul ayăt kơnê̆, hơtŏk pran tơdrong jang tôm kon pơlei vei xơđơ̆ng tơpôl teh đak.