Kơsơ̆ năr 19/06, Ƀĭ thư Trung ương Đảng, Kơdră Anih jang Tuyên yăo Trung ương Nguyễn Trọng Nghĩa chĕp kơ̆l khul kơpal kơ Anih jang Tuyên yăo Trung ương truh apong păng thơ thâu hơ-iă hăm jơnŭm pơgơ̆r, đe kang ƀô̆, bơngai chih kơtơ̆ng ang, pơre nơ̆r, bơngai jang lơ̆m Rađiô nơ̆r pơma Việt Nam (VOV) ƀơ̆t tơbăt 98 xơnăm năr Hla bar tơroi Kăch mang Việt Nam (21/6).

Hmach bơnê kơ VOV jing minh lơ̆m dôm anih jang hla bar tơroi dơnơm đei lơ tơplih pran kơtang vă hơtŏk pran tơroi tơbăt, vă hơyuh rapor kơ VOV gơh păr hơtaih jâ̆p jang tơring tơrang, truh hăm kon pơlei tơring xơlam teh, tơring hơtaih yaih păng mă kăl noh truh hăm kon pơlei Việt hơrih tơ̆ teh đak đe, ƀok Nguyễn Trọng Nghĩa tơrĕk: Tơdrong kiơ hlôi jang đei noh bơ̆n khŏm mă vei xơđơ̆ng păng jang tơnăp hloh. Hơyuh rapor VOV pơih rapor tơ̆ Trường Sa păng tơring Tây Nguyên noh 'lơ̆ng tơnăp. Kơlih âu ưh hơdrô̆ jing tơdrong pơchơt dăh mă chă tơroi tơbăt mă oei jing xơnong jang vei lăng Teh đak, xơkơ̆t hơdăh tơdrong pơgơ̆r kơdih kơ teh đak bơ̆n, tơdrong jang dŏng xar bar păng xek tơlang lơ tơdrong đei ƀôh nai dơ̆ng... Adoi hơpơi 'meh đe đŏng chĭ vei xơđơ̆ng thoi noh.