Tơ̆ hop akŏm, lơ kon pơlei pơtruh nơ̆r apinh hăm kơdră dêh char Đak Nông, akŏm mă lơ gah dôm tơdrong tơnap tap hăm jên asong jang, tơchơ̆t jang gah jên hu, tơchơ̆t gah teh, pơkă teh choh jang, tơdrong tơguăt 4 anih jang vă hơmet tơdrong “đei yua lơ hiong kơjă, đei kơjă noh ưh đei yua lơ”.

Kơtă tơroi atŭm hăm kon pơlei jang mir, ƀok Hồ Văn Mười, Kơdră Anih jang vei lăng kon pơlei dêh char Đăk Nông ăn tơbăt, dôm sơnăm kơ âu, choh jang xa kơ dêh char hlôi hơtŏk tôm tong, pơtoi tơgop jing 1 lơ̆m 3 tơdrong jang mŭk drăm tơm. Atŭm hăm noh sơkơ̆t, dêh char pơtoi akŏm pơgơ̆r jang drơ̆ng minh dôm sơnong jang, hơlen tơgŭm, tơplih tơchơ̆t jang vă pơklaih tơnap tap, tơhlăk tơhlĭn, pơm trong hiôk vă hơvơn asong jang tơgŭm kon pơlei, hơp tak xah hơtŏk tơ-iung.