Lơ̆m kơsô̆ vă jê̆ 40 nơ̆r tơgop pơma đơ̆ng bơngai tăh hla tơ̆ jơ tơƀơ̆p pơma dơnuh, găh lơ tơroi truh tơdrong tơ gar băl teh đơ̆ng kon pơlei hăm dôm kŏng ti, anih mơdro sa đei Teh đak pơjao teh. Kiơ̆ kơ bơngai tăh hla, tơdrong tơ gar băl teh âu hlôi pơdui đunh dôm jĭt sơnăm mă lei oei tam mă đei bơngơ̆t truh sek tơlang pơtôch.

Lăng ƀôh dôm tơdrong ƀơm truh vei lăng, iŏk yua păng tơ gar băl teh tơ̆ xăh Ninh Gia đei ƀôh tôch kơ mơmat păng pơdui đunh, ƀok Phan Đình Trạc, Bí thư Trung ương Đảng, Kơdră Ban Nội chính Trung ương athei kơdră chĕp kơ̆l dêh char Lâm Đồng tơtĕnh dăr hơlen, hơmet pơ ‘lơ̆ng pơtôch rim tơdrong mă hơdăh. Hăm dôm tơdrong găh gơh jang, Khŭl tang măt Quốc hội dêh char Lâm Đồng gô đei hla ar athei Anih tơm vei lăng Khŭl lĭnh mơ̆t jang hơmet pơ ‘lơ̆ng.