Pơma tơ̆ “Năr đĭ đăng kon pơlei vei lăng sơđơ̆ng teh đak” xăh Bình Đông, pơlei tơm Gò Công, dêh char Tiền Giang, ƀok Nguyễn Trọng Nghĩa lăng ‘lơ̆ng dôm tơdrong hơdrin đơ̆ng Đảng bộ, khŭl kơdră păng kon pơlei tơring hlôi hơtŏk jơhngơ̆m đon tơgoăt tơgoăl, iung jang pơjing pơlei pơla; hơdrin pơjing tơdrong jang đĭ đăng kon pơlei vei lăng sơđơ̆ng Teh đak.

‘Măng âu, ƀok Nguyễn Trọng Nghĩa hlôi asong 5 tŏ hnam tơgoăt tơgoăl păng asong tơmam ăn kơ 10 ŭnh hnam teh đak tơgŭm tơ̆ xăh Bình Đông. Khŭl kŭm hlôi năm ngôi păng asong 650 hla ar hŏk, 60 kơ suơ̆t hŏk ƀŏng ăn hŏk tro hnam trưng hŏk jăl 1 phường 2, pơlei tơm Gò Công.