Hlŏh 4 khei pơtâp pơhrăm, hăm jơhngâm đon adrin tôch ai đơ̆ng khul kăn ƀô̆, linh, mă loi 'nŏh jĭ dôm bơang vang pơtâp pơhrăm ăn dôm khul grŭp, tơdrong pơtâp pơhrăm đei pơgơ̆r 'lơ̆ng hơiă. Kơdră chĕp kơ̆l Anih roi tơƀôh kơ Trung ương chih răk đon adrin tôch tơnăp, atŭm hăm 'nŏh athei dôm anih jang, khul grŭp năng kăl tơdrong vei lăng 'lơ̆ng jơhngâm pran, hơmet 'lơ̆ng hlŏh ăn Lêh yak pơrŏ khul linh tơbăt 50 sơnăm Năr Tơblăh rơngei tơring Pơbăh.

Ƀok Nguyễn Trọng Nghĩa pơma hơdăh, đe ƀok kơdră chĕp kơ̆l Đảng, Teh đak păng Anih pơgơ̆r kơ Trung ương hơnơ̆ng hơlen năng păng tơchĕng 'lơ̆ng tơdrong pơtâp pơhrăm đơ̆ng rim khul linh păng khul grŭp kon pơlei, khul linh công an, plt HCM păng lơ tơring lơ̆m teh đak. Lêh tơbăt ưh lăp jơnăr vă pôk pơ ư chăl arih adrol đĕch mă oei vă pơtruh đon lui hăm ning mônh kơnh kơ teh đak, khul linh roi đunh roi pran kơjăp.