Dêh char atŏk kơtang năm dăr lăng sơđơ̆ng rơgoh tơmam drăm sa rim hnam gŏ kơ hnam trương, hơnih jang kmăi kmŏk pơm tơlĕch tơmam drăm, hơnih tơmang pơhiơ̆, rim hơnih pơm tơlĕch tĕch mơdro tơmam drăm sa, ‘nhem ‘nhot trong kơphô̆… Mă kăl, hăm dôm tơmam drăm sa mă rim hơnih bơ̆ jang hlôi đei ƀôh pơm glăi lơ̆m khei năr ou ki. Hơnih vei lăng kon pơlei dêh char Dak Lăk jei athei rim khul bơ̆ jang atŏk kơtang iung jang dăr lăng hơnih tĕch răt, mă kăl dôm tơmam drăm sa sơđơ̆ng rơgoh ăn jơhngơ̆m jăn, đak toh rơmo păng pơgang ming hơmet jĭ jăn tŏk bŏk đei chă tĕch mơdro lơ̆m hơnih tĕch mơdro điên tư. Dôm tơdrong pơm glăi gô xek tơlang kơhret păng tơroi tơbăt hloi lơ̆m brŏ, radiô tivi vă kon pơlei băt, veh ver răt yoa.