Iŏk nơ̆r pơjao đơ̆ng Kơdră chĕp pơgơ̆r teh đak, Kơ iĕng Kơdră Hơnih bơ̆ jang ăn Kơdră chĕp pơgơ̆r Teh đak Phạm Thanh Hà hlôi đŏk tơbăt hla bơar tơchơ̆t đơ̆ng Kơdră chĕp pơgơ̆r teh đak pôk tơmơ̆t kơchư̆k Kơ iĕng Kơdră chĕp pơgơ̆r Hơnih bơ̆ jang ăn Kơdră chĕp pơgơ̆r Teh đak hăm rim ƀok Cấn Đình Tài păng Nguyễn Hoàng Anh, rim bơngai jang tơgŭm ăn Kơdră chĕp pơgơ̆r teh đak Lương Cường; păng ƀok Nguyễn Dũng Tiến, bơngai jang tơgŭm ăn Kơ iĕng Kơdră chĕp pơgơ̆r Teh đak. Pôk ăn Hla bơar tơchơ̆t păng hmach chơt hơ iă ăn rim kơdră đei pôk tơmơ̆t, Kơdră chĕp pơgơ̆r teh đak pơma hơdăh, hăm kơchư̆k ‘nao, rim kơdră đei pôk tơmơ̆t kăl hơnơ̆ng pơhrăm jơhngơ̆m đon chinh trĭ, vei kơjăp jơhngơ̆m đon ‘lơ̆ng kơ kĕch mang; jang kiơ̆ ‘lơ̆ng, tơnăp dôm tơdrong jang, bơ̆ jang hơbĕch hơbal, chĕp pơgơ̆r hơgei, pơchoh trong trŏ lăp, ƀlep, tơtom, tơgop tơ iung pơjing Hơnih bơ̆ jang ăn Kơdră chĕp pơgơ̆r Teh đak kơtoei, gơh hơgei, pran kơtang, bơ̆ jang jơnei ‘lơ̆ng hơ iă hloh.