Vesak dăh mă pêng tơdrong lêh tih (đei tơbăt năr rơneh, jing bơngai lui păng đon hŭt pơđĭ rim tơdrong hơpơi ‘mĕh kơ kon bơngai tơ̆ yăn âu) đơ̆ng Ƀok Phât Thích Ca Mâu Ni đei năng jĭ tơdrong jŏh ayŏ kơ dŏ xoang kăp gĭt găh tơdrong lui yoa tơdrong rơngei păng đei chih tơbăt tơ̆ Liên hợp quốc jăl 54 ‘năr 15/12/1999.

Đơ̆ng sơnăm 2000 truh dang ei, Lêh tih Vesak Liên hợp quốc đei pơgơ̆r 19 vât, lơ̆m noh Việt Nam hlôi iŏk pơgơ̆r ‘lơ̆ng 3 vât: sơnăm 2008 tơ̆ Hnam hôp teh đak Mỹ Đình, Hà Nội; sơnăm 2014 tơ̆ Hnam chuơ Bái Đính, dêh char Ninh Bình; păng sơnăm 2019 tơ̆ hnam chuơ Tam Chúc, dêh char Hà Nam.

Hăm dôm tơdrong jơnei ‘nŏh, Việt Nam hơnơ̆ng đei rơih pơgơ̆r dơ̆ng Lêh tih Vesak LHQ ‘măng mă 20 sơnăm 2025 tơ̆ Hnam hŏk Lui Phât Việt Nam, apŭng Bình Chánh, plt HCM.

Jĭ bơngai lơ ‘măng vang truh pơm lêh tơ̆ Việt Nam, Ƀok chuơ Tiến sĩ Tampalawela Dhammaratana – Phŏ Kơdră chĕp kơ̆l Anih pơgơ̆r Lêh tih lơ̆m apŭng plenh teh Vesak Liên Hiệp Quốc (ICDV) tơƀôh đon tôch hơiă tơ̆ hơnăp dôm tơdrong adrin đơ̆ng Việt Nam vă pơm pơ ‘lơ̆ng hlŏh dơ̆ng jơhngâm đon hơdrĕch hơdrung păng tơdrong lui phât.

“Vesak LHQ 2025 tôch gĭt kăl, ưh lăp yoa ‘măng mă 4 Việt Nam pơgơ̆r đĕch mă yoa 50 sơnăm iŏk rơngei, pơjing đei 1 teh đak kơjăp ‘lơ̆ng. ‘Ngoăih kơ tơdrong tơgŭm tôch ‘lơ̆ng đơ̆ng Khul kơdră teh đak Việt Nam oei đei hloi tơdrong pơgơ̆r đơ̆ng Khul linh phât VN hai, mă bơngai chĕp kơ̆l ‘nŏh Ƀok chuơ tơm Thích Trí Quảng. ‘Nâu jĭ 1 ‘nu bơngai tơpăt ‘lơ̆ng, lui kơjăp, jĭ 1 trong pơgơ̆r tôch hơiă mă Khul lui Phât lơ̆m apŭng plenh teh gơ̆h hơlen năng hŏk kiơ̆. Inh ƀôh ‘nâu jĭ tơdrong jŏh ayŏ kơ dŏ xoang păng lơ tơdrong jang nai hai adrol, lơ̆m, păng đơ̆ng rŏng kơ Lêh tih pơm ăn kon pơlei lăp đon vang truh akŏm”.

Truh akŏm Vesak LHQ 2025 tơ̆ plt HCM sơnăm ‘nâu đei 1300 ‘nu bơngai tang măt lơ̆m apŭng plenh teh ‘nŏh jĭ đe ƀok Chuơ lơ̆m apŭng plenh teh; dôm bơngai tơchĕng hơlen, dôm bơngai đei hŏk jrŭ… truh đơ̆ng 85 teh đak. Tơdrong ‘nâu ưh lăp ăn ƀôh đon lui hăm teh đak pơgơ̆r đech mă oei tơƀôh hơdăh hơnăp jang đơ̆ng Khul lui Phât Việt Nam lơ̆m tơpôl lui Phât jơ̆p apŭng plenh teh dơ̆ng.

Lêh tih Vesak LHQ ‘măng mă 20 sơnăm 2025 đei hơnăn “Tơguăt pôm ƀơ̆r đon păng ‘mêm mơnat yoa jơhngâm đon kon bơngai: Lui Phât yoa Tơdrong rơngei lơ̆m apŭng plenh teh păng jang tŏk pran kơjăp”. Lêh tih đei pơgơ̆r hăm lơ tơdrong tơm nhen Lêh pơih blŭng, dôm hop akŏm lơ̆m apŭng plenh teh, lêh sơng tơmam ƀok Phât, tơdrong hơri hơxoang, hop akŏm găh nơ̆r ƀok Phât păng dôm tơdrong soi nai hai…

Pơma tơ̆ lêh tih, tang măt ăn Kơdră chĕp kơ̆l Đảng, teh đak Việt Nam, Kơdră teh đak bơ̆n ƀok Lương Cường pơma hơdăh, dôm kơjă kăp gĭt đơ̆ng nơ̆r pơtho lui Phât Iâm dim – Gơ̆h hơgei mă Ƀok Phât pơtho tơƀôh oei kăp gĭt hơnơ̆ng hăm kon bơngai hrei ‘nâu. Dôm kơjă kăp gĭt nhen jơhngâm đon ‘mêm kơ teh đak, băt ‘mêm mơnat kơ bơngai nai, đei đon hue lăng truh tơdrong ‘lơ̆ng đơ̆ng Khul lui Phât hlôi mât kơjăp lơ̆m jơhngâm đon bơngai Việt păng tơgop tưk tơiung tơdỏng juăt ‘lơ̆ng đơ̆ng joh ayŏ kơ dŏ xoang kơ hơdrĕch Việt Nam.

Kơdră teh đak Lương Cường pơma: “Đảng, Teh đak Việt Nam hơnơ̆ng tơchĕng ‘lơ̆ng păng pơjing rim tơdrong hiôk hian vă dôm tơdrong lui khop, lơ̆m noh đei lui phât pơgơ̆r hơkŭm, krao khan trŏ luơ̆t, bơ̆ jang ‘lơ̆ng ưh đei tơplih tơdrong tơchĕng năng kăl păng vei lăng tơdrong gơ̆h kiơ̆ lui khop mơ̆ng kơ vă đơ̆ng rim bơngai păng năng ‘nŏh jĭ tơdrong gĭt kăl vă tơguăt đĭ đăng hơdrĕch hơdrung. Rim bơngai kiơ̆ lui phât Việt Nam hlôi, tŏk bŏk păng vă hơnơ̆ng kŭm hăm bơngai lui phât lơ̆m apŭng plenh teh pơvih ăn tơdrong lui păng kon bơngai roi ‘lơ̆ng, yoa tơdrong tơm ‘nŏh jĭ rơngei hiôk hian, pơm tơbôl, jang hơdoi păng jang tŏk”

Lêh tih Vesak Liên hiệp quốc 2025 tơ̆ plt HCM jĭ 1 tơdrong tôch hơiă lơ̆m lơ tơdrong gĭt kăl nai tơgŭm ăn Việt Nam tơgop lơ ƀiơ̆ ăn tơdrong pơhnŏng bơ̆ jang rơbâu sơnăm đơ̆ng Liên hợp quốc yoa tơdrong rơngei hiôk hian păng jang tŏk kơjăp ‘lơ̆ng./.