Hop akŏm đei pơgơ̆r lăp đơ̆ng rŏng lơ ‘măng teh tơdrŏ ưh kơ măh ê tơ̆ dêh char. Kiơ̆ đơ̆ng Viện Vật lý địa cầu, đơ̆ng năr 4/4/2021 đei ƀôh rim ‘măng teh tơdrŏ tơ̆ dêh char Kon Tum hăm hơnih tơm teh tơdrŏ tơ̆ lơ̆m apŭng Kon Plông. Jô̆ truh đĭ khei 4/2025 tơ̆ tơring ou đei hloh 1.000 ‘măng teh tơdrŏ hăm tơdrong hơmơt đei răm kơtang đơ̆ng 0 truh kơtang mă 1. Kiơ̆ đơ̆ng rim bơngai khoa hŏk, teh tơdrŏ lơ̆m apŭng Kon Plông, dêh char Kon Tum đei ƀôh kiơ̆ trong joăt, ‘noh teh tơdrŏ tơtil hơnơ̆ng lơ̆m jơ ‘năr blŭng, roi đunh roi hui, păng pơdơ̆h hloi. Tơ̆ hơnăp tơdrong ou, atŭm hăm pơlăp 11 hơnih kmăi kmŏk hơlen tơ̆ Kon Tum, đơ̆ng khei 3/2024 Viện Vật lý địa cầu hlôi iung jang bơ̆ jang khoa hŏk “Chă tơchĕng lăng hơlen tơdrong teh tơdrŏ păng tơlĕch rim trong tang găn hơlou trŏ ƀlep hloh ăn dêh char Kon Tum păng rim tơring tơjê̆”. Trong tơlĕch jang tơm truh đĭ khei 2/2027 mưh pơtôch bơ̆ jang chă tơchĕng hơlen gô pơm hơdăh rim tơdrong tơm pơm ăn lơ ‘măng teh tơdrŏ pơrăm tơ̆ apŭng Kon Plông, dêh char Kon Tum; hơlen dôm tơdrong đei ƀơm truh ƀar păh teh tơdrŏ păng pơtơ̆ng đak lơ̆m dơnou; hơlen hơdăh tơdrong hli hlơt đơ̆ng teh tơdrŏ hăm kon pơlei pơla lơ̆m tơring păng tơ iung pơjing trong jang tang găn hơlou ăn tơring kơ apŭng Kon Plông adoi nhen rim tơring tơjê̆.