Tang măt ăn kơdră chĕp kơ̆l Đảng, teh đak, yă Trương Thị Mai – Kơdră chĕp kơ̆l Ban Bí thư hơiă hăm dôm tơdrong jơnei mă Đảng ƀô̆ Grŭp iŏk đei lơ̆m 75 sơnăm âu ki. Atŭm hăm ‘nŏh athei, truh âu kơnh Đảng ƀô̆ Grŭp kăl hơtŏk đon hlôh vao, hơnăp jang đơ̆ng anih jang đảng, kăn ƀô̆, đảng viên găh anih dơ̆ng, hơnăp jang, tơdrong jang chinh trĭ đơ̆ng Đảng ƀô̆ Grŭp tơklep hăm tơdrong jang chinh trĭ đơ̆ng rim anih chĕp kơ̆l đảng, đảng ƀô̆, chi ƀô̆, kăn ƀô̆ păng đảng viên.

Kŭm hăm ‘nŏh, năng kăl tơlĕch jang ‘lơ̆ng, đei yoa dôm hla ar chih pơtho, tơdrong tơchơ̆t gĭt kăl đơ̆ng Đảng lơ̆m jăl XIII nhen nơ̆r pơkăp kơsô̆ 21- găh hơtŏk tơdrong pơjing, hơmet ming Đảng păng rim anih jang chinh trĭ; khŏm tang găn, sek tơlang tơpăt đe kăn ƀô̆, đảng viên đei jơhngâm đon chinh trĭ ưh kơ ‘lơ̆ng, arih xa ưh kơ lăp, tơchĕng kơdih, tơplih kơdih.