Lơ̆m kơthơ chih nơ̆r hơiă, Kơdră chĕp kơ̆l Đảng Teh đak Nga Jing mĭnh Dmitry Medvedev tơƀôh đon lui, hăm tơdrong jang chinh trĭ gơ̆h hơgei đơ̆ng kơdih, Tổng Bí thư, Kơdră teh đak ƀok Tô Lâm gô tơgop ‘lơ̆ng ăn tơdrong jang atŏk tơiung mŭk drăm – tơpôl păng trong jang tơbôl kơdih đơ̆ng Việt Nam; atŭm hăm ‘nŏh, lui, tơdrong pơvei đơ̆ng Đảng Teh đak Nga jing minh păng Đảng Cộng sản Việt Nam hơnơ̆ng đei hơmet kơjăp hlŏh dơ̆ng yoa tơdrong đei yoa đơ̆ng kon pơlei 2 teh đak. 

Lơ̆m kơthơ chih nơ̆r hơiă, Kơdră chĕp kơ̆l Đảng Cộng sản Nhật Bản Shii Kazuo hơpơi ‘mĕh păng lui 2 đảng hơnơ̆ng jang hơdoi, pơvei kơjăp păng tưk tơiung tơdrong jang hơdoi, pơm pơm ‘lơ̆ng hlŏh dơ̆ng tơdrong pơvei đơ̆ng 2 đảng, hơtŏk tơdrong pơvei kơ 2 teh đak. Ƀlep ƀât ‘măng mă âu, Tổng Bí thư Đảng Mặt trận Tơblăh iŏk ngei Kon pơlei Sri Lanka, Kơdră chĕp kơ̆l Anih jang tơbôl kơ Đảng Cộng sản Tây Ban Nha Manuel Pineda, Bí thư apŭng plenh teh Đảng Cộng sản dôm hơdrĕch hơdrung Tây Ban Nha Víctor  Lucas, Kơdră Anih vei lăng tơdrong pơvei lơ̆m apŭng plenh teh kơ Đảng Khul kon pơlei Xã hội chủ nghĩa Ai Cập, Bí thư Đảng Cộng sản Sudan Fathi Alfadl kŭm gơih kơthơ, pơtruh nơ̆r hơiă hăm Tổng Bí thư, Kơdră teh đak bơ̆n, ƀok Tô Lâm ‘năi.