Roi tơbăt tơ̆ jơ bơ̆jang, ƀok Lê Thành Đô, Kơdră Anih vei lăng kon pơlei dêh char Điện Biên tơbăt, tơring tŏk bŏk akŏm tơlĕch jang 18 tơdrong jang hơmet ming anih kơdrơ̆m pơyua ăn tơbăt 70 sơnăm tơblăh Jơnei Điện Biên Phủ. Truh jơ năr âu, đei 5 tơdrong jang hlôi tơlĕch jang, tơchĕng hơdrol jang đang hơdrol kơ ‘năr 10/4/2024; Hơdrô̆ tơdrong jang Hnam tơmoi ƀĭch dêh char hlôi jang đang đơ̆ng 80% tơ̆ kơpal, tơchĕng hơdrol jang đang pơđĭ lơ̆m tŏk bŏk giĕng khei 4 vă hơmet ăn sơng, pơvih pơvăn ăn bơngai tang măt păng tơmoi tơmang lăng lơ̆m năr tơbăt 70 sơnăm tơblăh Jơnei Điện Biên Phủ.

Iung pơma tơ̆ jơ bơ̆jang, ‘ngoăih kơ chih iŏk dôm tơdrong hơdrin đơ̆ng dêh char Điện Biên lơ̆m tơdrong jang hơmet ăn dôm tơdrong hiôk ‘lơ̆ng vă pơvih pơvăn ăn lêh tơbăt, yă Trương Thị Mai kŭm athei dôm anih jang tơgŭm athei pơjing trong jang atŭm đơ̆ng lêh tơbăt 1 trong hơdăh, ‘lơ̆ng tôm.