Tơ̆ jơ bơ̆ jang, ƀok Nguyễn Đình Trung, Kơdră jang lơ̆m Trung ương Đảng, Bí thư đảng dêh char Dak Lak tơchĕng ‘lơ̆ng tơdrong yak hơdai đơ̆ng Radio nơ̆r pơma Việt Nam lơ̆m tơdrong roi tơbăt găh dêh char khei ‘năr âu ki. Tơdrong VOV đei lơ tơdrong tơroi hăm nơ̆r kon kông tơ̆ Dak Lak păng tơring Tây Nguyên, ‘nŏh jĭ tơdrong gĭt kăl vă pơm hơtŏk tơdrong đei yoa mưh roi tơbăt hăm kon pơlei tơ̆ jơ̆p pơlei pơla. 

Ƀok Đỗ Tiến Sỹ pơma hơdăh Radio nơ̆r pơma Việt Nam hlôi păng vă hơnơ̆ng yak hơdoi hăm dêh char Dak Lak hơtŏk tơdrong roi tơbăt. Dôm tơdrong đei tơ̆ dêh char hơnơ̆ng đei Anih jang kơ Radio nơ̆r pơma Việt Nam chih tơroi tơtom kiơ̆ lơ kênh pha ra băl đơ̆ng Radio, hăm đon jang tơnăp, tơƀôh trong roi tơbăt tôch rơđăh, đei yoa ‘lơ̆ng ăn tơpôl.