Rơnĕh păng arih truh ‘lŏ tơ̆ plei Lại Đà, xăh Đông Hội, apŭng Đông Anh, pơlei tơm Hà Nội – 1 pơlei hiôk sơđơ̆ng hăm kon pơlei jang chŭn mir iâm dim, mă lei đei tơdrong juăt tôch pơnam hŏk, jĭ kon hơdruch lơ̆m hnam jang chŭn mir, đei lơ ‘nhŏng oh dơ̆ng. Tổng Bí thư Nguyễn Phú Trọng hơnơ̆ng đei bôl boăl hŏk hơdai băt truh hăm hơkâu jăn iĕ, 2 păh măt hlăng hơdăh, mă loi tôch iâm păng pơnam hŏk. Đơ̆ng rŏng âu iŏk jang lơ kơchư̆k gĭt kăl yoa Đảng, Teh đak păng kon pơlei pơjao nhen: Kơdră jang lơ̆m Trung ương Đảng đơ̆ng jăl VII truh jăl XIII; Kơdră jang lơ̆m Anih tơm Chinh trĭ đơ̆ng jăl VIII truh jăl XIII; Kơdră vei lăng Kơsơ̆p hla ar tơroi Cộng sản; Kơdră vei lăng Khul jang Lý luận Trung ương; Bí thư Đảng pơlei tơm Hà Nội; Kơdră Quốc hội; Kơdră teh đak; Tổng Bí thư đơ̆ng jăl XI truh jăl XIII, ƀok Nguyễn Phú Trọng đei lơ tơdrong tơgop tih tên, gĭt kăl ăn tơdỏng jang kăch mang đơ̆ng Đảng păng hơdrĕch bơ̆n.

Ƀok Đào Duy Quát, sơ̆ pơm Phŏ Kơdră chĕp kơ̆l Ban Tuyên giáo Trung ương tơroi: ”Lơ̆m đĭ đăng tơdrong jang gĭt kăl đơ̆ng kơdih, ƀok Nguyễn Phú Trọng hlôi bơ̆ jang hăm jơhngâm đon tôch kơchăng, trŏ khoa hŏk, bơ̆ jang tôch tơnăp hăm đon tơchĕng ‘lơ̆ng đơ̆ng đei pơtâp pơhrăm tơ̆ yăn âu kơna ƀok hơnơ̆ng jang đang ‘lơ̆ng rim tơdrong jang đei pơjao. Mă loi, hăm kơ chư̆k pơm Tổng Bí thư 3 jăl jang, ƀok hơmet kơjăp tơdrong pơvei, mât 1 jơhngâm đon đơ̆ng Anih tơm Chinh trĭ, Ban Bí thư, Khul kơdră chĕp kơ̆l Trung ương năm truh tơdrong drơ̆ng pôm nơ̆r lơ̆m đĭ đăng Đảng.”

Tơdrong arih xa tơpăt ‘lơ̆ng, ưh đei pơang pơrŏ, oei kơjăp hăm tơring đei ƀôh hơdăh lơ̆m tơdrong bơ̆ jang kŭm nhen tơdrong arih xa rim năr. Hăm Đảng viên Phùng Huy Đan ƀok hơnơ̆ng ƀôh, kon bơngai đơ̆ng Tổng Bí thư jĭ um rup tôch ‘lơ̆ng găh jơhngâm đon kăch mang, iâm dim, hơlăng rơhău, băt ‘mêm kon pơlei, ‘mêm kơ rim răih bơngai. Tơdrong hơiă hlŏh mă ƀok ƀôh lơ̆m jơhngâm mưh vang truh hăm 4 ‘măng tơƀâp bơngai tăh hla đơ̆ng Khul tang măt Quốc hội anih pôk rơih kơsô̆ 1 pơlei tơm Hà Nội anih mă ƀok Tổng Bí thư Nguyễn Phú Trọng pơm Bơngai tang măt Quốc hội păng truh dang ei oei đei hơnơ̆ng lơ̆m jơhngâm đon Bơngai tăh hla Phùng Huy Đan ‘nŏh jĭ:

“Inh tôch hơiă đei tơƀâp mih Trọng tơ̆ 4 ‘măng tơƀâp bơngai tăh hla, mih tơƀâp bơngai tăh hla, pơma nuh hăm kon pơlei tôch hơiă, mưh bơngai tăh hla iung pơma, mih răp mơ̆ng tôm tĕch, chih răk tôm tơdrong kăl. Đơ̆ng rŏng kơ pơma đang, ƀât vă pơma nơ̆r hơtuch, mih akhan, đĭ đăng mih ma duch nă jĭ bơngai hlôh vao, tơchĕng hơlen tôch hơdăh găh dôm trong jang. Kơna iĕm gơ̆h đei lơ nơ̆r tơgop tôch đei yoa ăn Quốc hội, nơ̆r pơma đơ̆ng iĕm tôch trŏ, sư kơkach trŏ ƀât anih đơđik, truh jơ pơdơ̆h ngôi mih năm rôp ti rim bơngai. Đĭ đăng bu bu kŭm ‘mĕh ngôi hơdai, phĭn rup hăm mih”.

Jĭ bơngai chĕp kơ̆l tih hlŏh kơ Đảng, Tổng Bí thư Nguyễn Phú Trọng tơrek truh tơ̆ rim khul, rim anih jang păng rim tơdrong jang, đơ̆ng khoa hŏk, pơtho pơhrăm truh jŏh ayŏ kơ dŏ xoang, chih hla ar tơroi; đơ̆ng tơdrong jang sut pơđĭ pơngot, tơjur tơnuh hin truh tơdrong pơtho pơhrăm jơhngâm đon ‘mêm kơ teh đak, ‘mêm kơ kăch mang ăn rim jơhnơr…, truh tơ̆ yơ kŭm ƀôh jơhngâm đon jang tơnăp đơ̆ng ƀok ngăl. Truh hăm pơlei tơm Hồ Chí Minh “ƀrưch ‘lơ̆ng hơnăn măih” păng kon pơlei Tơring Pơbăh “tôch ‘mêm kơeng”, Tổng Bí thư hơpơi ‘mĕh pơlei tơm Hồ Chí Minh tơpă jĭ pơlei tơm đei ƀĕnh jơhngâm đon ‘mêm kơeng, gơ̆h hơgei; kon pơlei đei tơdrong arih xa phĭ tơnŏ, hiôk chơt, ‘mĕh thoi noh pơlei tơm athei hơnơ̆ng tơmât jên tơplih ‘nao, hơmet pơ ‘lơ̆ng tơdrong pơtho pơhrăm, tưk tơiung khul bơngai jang, mă loi jĭ hăm khul bơngai jang rơgei, khul bơngai vă rơih tŏk chĕp kơ̆l, vei lăng; jang tŏk mă pran găh khoa hŏk – kơmăy kơmŏk hơdai hăm atŏk tơiung mŭk drăm đon rơgei, pơm anih gơn tơjră vă tưk tơiung pơlei tơm tŏk hrĕnh păng kơjăp.

Oei hăm Đảng ƀô̆, kon pơlei dôm hơdrĕch hơdrung dêh char sơlam Lạng Sơn, Tổng Bí thư tơtă, hăm hơnăp jang jĭ tơring tơ̆ jih gĭt kăl kơ teh đak găh khul linh, vei lăng sơđơ̆ng, hơdai hăm ‘nŏh jĭ tơring gĭt kăl găh jang mŭk drăm, vei kơjăp anih tĕch mơdro kŭm nhen vei lăng tơdrong pơm tơm, vei lăng sơđơ̆ng mŭk drăm teh đak; athei kơchăng bơ̆ jang mă ‘lơ̆ng tơdrong jang tơbôl păng mât hơdai hăm apŭng plenh teh, pơjing tơring sơlam rơngei hiôk hian, tơbôl, pơjing tơdrong hiôk hian vă jang tŏk mŭk drăm, tơpôl kơ dêh char, kơ tơring tŏk bŏk jăl đak krong, tơring groi kông Găh Tu păng jơ̆p lơ̆m teh đak.

Hăm anih tơm Hà Nội, ưh lăp ‘mêm kơeng hăm tơring teh kơdih kâu rơneh păng tih vơ̆ đĕch, mă oei đei ƀĕnh jơhngâm đon tôch tơnăp hăm Anih tơm – plei nuih kơ teh đak, Tổng Bí thư Nguyễn Phú Trọng hơnơ̆ng ‘măn đon pơngơ̆t tôch brĕ păng đei lơ nơ̆r pơtho tôch ‘lơ̆ng hơiă, gĭt kăl hăm tơdrong jang tŏk kơplăh dang ei păng đunh đai ning mônh.

Tổng Bí thư Nguyễn Phú Trọng čhưu jơhngâm pơma: “Pơma truh Anih tơm Hà Nội, lơ̆m jơhngâm rim răih bơngai tơ̆ groi teh Việt ƀôh čhưu jơhngâm, hưch hanh kơ groi teh rơbâu sơnăm ‘lơ̆ng rŏ păng kơtang nuih mơng, gơ̆h hơgei păng iâm dim, Anih tơm kơ đon rơgei, jơhngâm đon ‘lơ̆ng kơ kon bơngai, Pơlei tơm yoa tơdrong rơngei, vă đơ̆ng noh "mă năm tơ̆ jơ̆p jang tơring, jơhngâm đon oei hơnơ̆ng ƀlŏk kơ Hà Nội". Păng tơpă thoi noh, đĭ chăl arih bơ̆ jang “yoa teh đak, yoa kon pơlei”, Ƀok Hô hơnơ̆ng ‘măn ăn Anih tơm Hà Nội ƀĕnh tơdrong ‘mêm kơeng. Hà Nội kŭm jing tơring đei lơ tơdrong gĭt kăl lơ̆m tơdrong jang kăch mang đơ̆ng Ƀok, 1 lơ̆m dôm tơring mă Ƀok Hô arih păng bơ̆ jang đunh hlŏh, tơring đei lơ đơl jơ̆ng Ƀok yak, mưh vih tơ̆ Hà Nội, Ƀok hơnơ̆ng yoa nơ̆r "Anih tơm bơ̆n". Lơ̆m năr mă blŭng Anih tơm đei tơblăh rơngei (10-10-1954), Ƀok chih: "Jơ̆p lơ̆m teh đak huei lăng tơ̆ Anih tơm bơ̆n, apŭng plenh teh ‘ngơn lăng tơ̆ Anih tơm bơ̆n, đĭ đăng bơ̆n athei adrin vei kơjăp tơdrong sơđơ̆ng, pơm ăn ăn Anih bơ̆n jing 1 anih tơm rơngei ‘lơ̆ng rŏ, hiôk hian, pran jăng găh tơmam drăm păng jơhngâm đon, ‘nâu jĭ tơdrong đei tơrek hlŏh păng kŭm jing nơ̆r athei, đon hơpơi ‘mĕh, đon lui vă Hà Nội tơpă gơ̆h jang tŏk pran ‘lơ̆ng, hơnơ̆ng năm hơdrol, tơƀôh trong chong glung ăn jơ̆p tơring lơ̆m teh đak nhen nơ̆r tơtă đơ̆ng Ƀok Hô hăm Anih tơm bơ̆n.”

Đơ̆ng dôm ‘măng truh hăm kon pơlei păng tơdrong dăr lăng tơ̆ yăn âu, lơ đon tơchĕng ‘nao, lăp hăm yăn âu đei Tổng Bí thư Nguyễn Phú Trọng athei hăm Đảng, Teh đak mưh tơlĕch dôm trong jang, tơdrong tơgŭm vă vei sơđơ̆ng ‘lơ̆ng mŭk drăm tơpôl păng jang tŏk teh đak, pơjing chủ nghĩa xã hội. Hăm dôm tơdrong jang tôch hơdăh, Tổng Bí thư Nguyễn Phú Trọng hlôi tơƀôh hơdăh um ai kơ 1 ‘nu bơngai chĕp kơ̆l tôch rơgei, đei ƀĕnh jơhngâm đon ‘lơ̆ng, jang tôch tơnăp lăp hăm yăn âu, pơ̆n tơchĕng, pơ̆n bơ̆ jang, pơ̆n chĭu pŭ tơ̆ hơnăp Đảng, tơ̆ hơnăp kon pơlei, yoa thoi noh mă đei kon pơlei ‘mêm kơeng.

Plei nuih bơngai Cộng sản tơpăt ‘lơ̆ng Tổng Bí thư Nguyễn Phú Trọng ưh pă đei tơteh bơih mă lei đĭ đăng Đảng, đĭ đăng kon pơlei păng đĭ đăng khul linh bơ̆n oei ƀlŏk hơnơ̆ng um rup 1 ‘nu bơngai tôch rơgei kơ kăch mang Việt Nam, bơngai tơchĕng hơlen, bơngai joh ayŏ chih pơcheh, hơnơ̆ng năm hơdrol lơ̆m tơdrong chih tơblang kơ Đảng, arih đĭ jơhnơr yoa teh đak, yoa kon pơlei, yoa đon tơchĕng ‘lơ̆ng rŏ, trŏ ƀlep./.