Ƀlep ƀơ̆t teh đak Campuchia pơjing Kuôk hô̆i jăl 7 păng Khŭl kơdră teh đak jăl jang 7 (2023-2028), Thủ tướng Phạm Minh Chính hlôi gơih kơ Thơ hmach chơt hơiă kơ Thủ tướng Hun Manet; Kơdră Kuôk hô̆i Vương Đình Huệ hlôi gơih kơ Thơ hmach chơt hơiă Kơdră Kuôk hô̆i Khuon Sodary (Khuôn Su-đa-ri). Lơ̆m kơ Thơ hmach chơt hơiă, Kơdră chĕp kơ̆l Việt Nam tơƀôh tơdrong lui ngeh hăm tơdrong chĕp kơ̆l đơ̆ng Thủ tướng păng Kơdră Kuôk hô̆i ‘nao, Campuchia gô hơnơ̆ng ‘măn đei lơ jơnei tih tên lơ̆m tơdrong jang pơjing teh đak rơngei, sơđơ̆ng păng hơtŏk tơiung ‘lơ̆ng hơiă, đei hơnăp jang păng anih dơ̆ng roi ‘năr roi ‘lơ̆ng tơ̆ tơring păng lơ̆m apŭng plĕnh teh.

Kơdră chĕp kơ̆l Việt Nam kŭm lui ngeh akhan tơ̆ hơnăp kơnh tơdrong pơvei teh đak tơ jê̆ băl ‘lơ̆ng hơiă, tơbôl joăt joe, jang hơdai tôm tơdrong, kơjăp đunh đai đơ̆ng Việt Nam păng Campuchia gô hơnơ̆ng đei hơmet ‘lơ̆ng păng hơtŏk tơiung, yua kơ tơdrong đei yua đơ̆ng kon pơlei 2 teh đak, tơgop ‘lơ̆ng ăn tơpôl ASEAN, yua kơ tơdrong rơngei, sơđơ̆ng păng hơtŏk tơiung kơ tơring păng apŭng plĕnh teh.