Iung pơma tơ̆ hop akŏm, Kơdră chĕp pơgơ̆r Ban bí thư Lương Cường pơma hơdăh, lăp pă hloh 1 khei dơ̆ng ‘noh pơtôch jăl XIII kơ Đảng, kơ yuơ lơ loh, Ban Nội chính Trung ương kăl kơrŭn đĭ ai, iung jang kơtang, jơnei hloh dơ̆ng vă tơgop jang keh đang tôm tong tơdrong bơ̆ jang, iung tơjră tang găn sa pơgơ̆m pơjĭp păng hơmet pơ ‘lơ̆ng tư pháp kiơ̆ Tơdrong tơchơ̆t Pơm lêh hop akŏm XIII kơ Đảng. Kăl hơnơ̆ng jang ‘lơ̆ng pơchoh trong iung tơjră tang găn sa pơgơ̆m pơjĭp, tơdrong glăi, tơklep hăm tơlĕch jang kiơ̆ Tơdrong tơchơt 144  kơ Hơnih tơm Chinh trĭ găh hơmet ăn jơhngơ̆m đon ‘lơ̆ng kơ kang ƀô̆, đảng viên lơ̆m chăl hle. Atŭm hăm ‘noh, hơnơ̆ng vang pơchoh trong hơmet pơ ‘lơ̆ng keh đang rim tơdrong pơm glăi, tơdrong sa pơgơ̆m pơjĭp, dôm tơdrong glăi đei ƀơm truh kang ƀô̆, đảng viên, bơ̆ jang ‘lơ̆ng ăn tơdrong bơ̆ jang Pơm lêh hop akŏm Đảng rim hơnih.