Kiơ̆ tơbăt, truh dang ei, Yên Bái đei 18 lơ̆m 19 trong tơlĕch jang hlôi jang keh đang trong tơlĕch jang đơ̆ng Tơdrong tơchơ̆t Pơm lêh hop akŏm XIX Hơnih Đảng dêh char, đei 1 trong tơlĕch jang kăl akŏm pơrô̆ kơtang păng đei trong tơlĕch jang hơdrin vă jang keh đang ‘nŏh bri ‘long hơyơ̆l ăn kơ teh đơ̆ng 63% truh 65%. 

Iung pơma tơ̆ jơ bơ̆ jang, Kơdră chĕp pơgơ̆r Ban Bí thư Trương Thị Mai hôn bơnê dôm tơdrong hơdrin đơ̆ng Hơnih Đảng dêh char Yên Bái hlôi hơdrin yak hloh tơnap tap vă jang keh đang gĭt kăl lơ̆m tŏk bŏk jăl jang au ki. Lơ̆m au, mă kăl ‘nŏh Yên Bái hlôi akŏm kơtang tơlĕch jang kiơ̆ ‘lơ̆ng bơ̆ jang pơrô̆, tơlĕch jang hơdăh lơ̆m jang kiơ̆ Tơdrong tơchơ̆t. Adoi pơma hơdăh, đơ̆ng dang ei truh đĭ jăl jang, Yên Bái kăl lăng ba kơjăp tơlĕch jang rim trong jang thuê̆ ăn hơnih mong jên bơ̆ jang sơđơ̆ng trong tơlĕch ăn; lăng ba kơjăp tơdrong pơtho pơjing khul bơ̆ jang; atŏk tơdrong hơrih sa-jơhngơ̆m đon kon pơlei kon kông sơđơ̆ng ‘lơ̆ng liĕm. Kăl pơtho pơhrăm ming vă trŏ lăp hăm tơdrong bơ̆ jang.