Khei 9/2023, tơ̆ pơlei tơm Pleiku, dêh char Gia Lai, Kơdră teh đak Võ Văn Thưởng năm ngôi păng bơ̆jang tơ̆ Binh đoàn 15 - anih jang đei vă jê̆ 40 sơnăm bơ̆jang kiơ̆ hơnăp jang pơjing dôm Hơnih jang mŭk drăm khŭl linh lơ̆m tơring gĭt kăl Tây Nguyên.

Pơma hơdăh, tơring Tây nguyên đei anih dơ̆ng gĭt kăl, jĭ pơbŭng hnam Đông Dương, Kơdră teh đak athei Binh đoàn 15 hơnơ̆ng vei kơjăp đon tơchĕng, trong jang khŭl linh đơ̆ng Đảng, Quân ủy Trung ương, Anih tơm vei lăng khŭl linh, chĕp kơ jăp tơdrong jang vei lăng teh đak lơ̆m tơdrong ‘nao, Tơdrong tơchơ̆t đơ̆ng Anih tơm Chĭnh trĭ găh trong jang hơtŏk tơiung mŭk drăm -tơpôl păng vei sơđơ̆ng tơring Tây nguyên truh sơnăm 2030, lăng truh sơnăm 2045. Iung jang hơdoi hăm kơdră đảng, kơdră chĕp pơgơ̆r kơ tơring păng kon pơlei lơm tơring oei vă hơdrin jang kiơ̆ rim tơdrong jang atok tơ iung mŭk drăm tơpôl; vei kơjăp hơnăp jang yuk trong hơlau jang kiơ̆ rim tơdrong jang kơ tơring mă hơnih oei.

Khei 8/2023, Thủ tướng Phạm Minh Chính pơm jang hăm Anih juăt jang Tĭnh uy Kon Tum gah tơdrong jang kiơ̆ sơnong hơtŏk mŭk drăm – tơpôl.

Thủ tướng teh đak bơ̆n Phạm Minh Chính pôk bơnê kơ dôm tơdrong jang đei jơnei đơ̆ng Anih jang Đảng, jơnŭm pơgơ̆r tơring, khul linh păng kon pơlei dêh char Kon Tum. Lơ̆m khei năr truh Thủ tướng pơkăl Kon Tum athei hơtŏk tơ-iung tenh, pran, kơjăp sơđơ̆ng hloh dơ̆ng, athei vei sơđơ̆ng tơpôl tơ̆ tơring kon kông, tơdrong khop, sơlam teh păng ưh đei lê̆ đei tơdrong ưh kơ ‘lơ̆ng gah sơđơ̆ng tơpôl chĭnh trĭ. Pơjing tơring sơđơ̆ng kơjăp vă jang hadoi mŭk drăm apŭng plenh teh, hơtŏ hơnơ̆ng, đei jơnei păng vei răk tơƀăk mong joh ayŏ kon kông. Thủ tướng pơkăl tơ̆ anăp athei akŏm hơlen dôm tơdrong tơchơ̆t, sơnong jang vă akŏm pơgơ̆r jang gơh đei jơnei, sơnăm đơ̆ng rŏng kơjung hloh sơnăm hơdrol păng hơdrin đei jơnei hloh kơ dôm tơdrong tơchơ̆t tơlĕch.